İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 818 Hüküm no: 1115 Orijinal metin no: [114b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahbaz bt. Abdullah’ın evini Mehmed b. Hüseyin’e sattığı Mahmiye-i İstanbul’da Arabacı Bayezid mahallesi sâkinelerinden Şahbaz bt. Abdullah nâm hâtun tarafından zevci Süleyman Çelebi b. Abdullah ve mezbûreyi ma‘rifet-i şer‘iyye ile ârifân Şeyhzâde Halil Çelebi şehâdetleri ile sâbitü’l-vekâle vekîl olan Abdülbâkī Ağa b. Hüseyin işbu sâhibü’l-kitâb Mehmed Efendi b. Hüseyin mahzarında bi’l-vekâle ikrâr ve takrîr-i kelâm edip müvekkilem mezbûre Şahbaz Hâtun mahalle-i mezbûrede vâki‘ bir tarafdan ba‘zan Medîne-i Münevvere vakfı ve ba‘zan Sâliha Hâtun mülkü ve bir tarafdan Başmakçı vakfı ve ba‘zan Mehmed Çelebi mülkü ve ba‘zan tarîk-i âm ve bir tarafdan ba‘zan İsmihan Hâtun bt. Rıdvan Halîfe mülkü ve ba‘zan Solak Hüseyin Çelebi mülkü ve bir tarafdan Tuğcu Ahmed Çelebi mülkü ile mahdûd üç beyt-i ulvî ve bir sofa-i ulviyye iki beyt-i süflî ve bir sofa-i süfliyye ve bir su kuyusu ve cüneyne ve kenîfi müştemil mülk menzilini, cümle tevâbi‘ ve levâhık ve kâffe-i menâfi‘ ve merâfık ile merkūm Mehmed Efendi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile kırk bin nakd-i râyic fi’l-vakt akçeye bey‘ ve teslîm ol dahi iştirâ ve kabz ve tesellüm eyledikden sonra semeni olan meblağ-ı merkūm kırk bin akçeyi müşterî-i mezbûr Mehmed Efendi yedinden bi’t-tamâm ve’l-kemâl alıp kabz eyledi ba‘de’l-yevm menzil-i mahdûd-ı mezbûr merkūm Mehmed Efendi’nin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’l-hâmis min Cemâziyelevvel li sene erba‘a ve seb‘în ve elf. Şuhûdü’l-hâl: Ömer Bey b. Mustafa, Mustafa Çelebi b. Mehmed, Abdullah Çelebi b. Ahmed, Ali Beşe b. Osman ve gayruhüm.