İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 820 Hüküm no: 1118 Orijinal metin no: [115a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer b. el-Hâc Yusuf’u öldürdüğü iddia edilen Yusuf b. el-Hâc Bayındır’ın muhakeme edilmesi Vilâyet-i Anadolu’da Yusuflu oymağından olup cerîhan fevt olan Ömer b. el-Hâc Yusuf nâm kimesnenin verâseti vâlidesi Hâce Yüzükutlu bt. el-Hâc Receb ve sulbiye kızı Sâfiye nâm sagīreye ve li ebeveyn er karındaşı el-Hâc Halil b. Yusuf’a münhasıra olduğu şer‘an mütehakkik oldukdan sonra mezbûr el-Hâc Halil kendi nefsinden asâleten ve sagīre-i mezbûrenin kıbel-i şer‘den mansûb vasîsi olmamağla vesâyeten ve mezkûre Hâce Yüzükuvvetli asâleten dîvân-ı sa‘âdet-makrûnda ma‘kūd olan mahfil-i kazâda, vilâyet-i mezbûrede Şerefli oymağından Yusuf b. el-Hâc Bayındır nâm kimesne üzerine her biri takrîr-i da‘vâ edip târih-i kitâbdan yedi ay mukaddem Ercis Dağı’nda Akçalı’da Akçakısık nâm mevzi‘de mezbûr Yusuf mûrisimiz müteveffâ-yı mezbûr Ömer’in ensesine balta ile darb ve cerh ettirip ol cerhden ifâkat bulmadan on gün sonra ol cerhden fevt olmağla târih-i kitâbdan dört ay mukaddem dîvân-ı sa‘âdet[de] bi’d-defe‘ât mezbûr Yusuf ile müterâfi‘ân ve vech-i muharrer üzre mûcebince üzerine da‘vâ eylediğimizde, mezbûr Yusuf husûs-ı mezbûru bi’l-külliye inkâr eylediği ecilden mahallinden beyyine getirmek için istimhâl ve mezkûr Yusuf’u sicn-i sultânî’de haps ettirip dört aydan bu âna gelince mahbûs olup beyyinem bunda getirdiğim ecilden hapisden ıtlâk olunup mahallinde görülmek için mezbûr Yusuf ile mu‘âhede eylemişizdir dediklerinde, mezkûr Yusuf hapisden ıtlâk olunup mâ vaka‘a bi’t-taleb ketb olundu. Fi’l-yevmi’l-hâmis min Cemâziyelevvel li sene erba‘a ve seb‘în ve elf. Şuhûdü’l-hâl: Abdi Çelebi b. Hüseyin, Şükrullah b. Mustafa, Baba Resûl b. Mehmed, Mustafa b. Ali ve gayruhüm.