İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 830 Hüküm no: 1139 Orijinal metin no: [117a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Afife bt. el-Hâc Mehmed’in eşi Mehmed Çelebi’den muhâlaa yoluyla boşandığı Mahmiye-i İstanbul’da Molla Hüsrev mahallesinde sâkine Afife bt. el-Hâc Mehmed tarafından husûs-ı âti’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân olan mahalle-i mezbûre sükkânından İbrahim Efendi b. Halil el-Müezzin ve Mustafa Efendi b. Süleyman şehâdetleri ile şer‘an vekâleti sâbite olan babası mezbûr el-Hâc Mehmed b. İbrahim meclis-i şer‘-i hatîr-i lâzımü’t-tevkīrde müvekkile-i mezbûrenin zevci işbu bâ‘isü’l-kitâb Mehmed Çelebi b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkilem merkūme Afife zevci merkūm Mehmed Çelebi zimmetinde mütekarrir ve ma‘kūdun-aleyh olan altı bin akçe mehr-i müecceli ve nafaka ve iddet-i ma‘lûmesi üzerlerine ve me’ûnet-i süknâsı dahi kendi üzerime olmak üzre mersûm Mehmed Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika âmme-i da‘vâdan her biri âharın zimmetini ibrâ-i âmm-ı kātı‘ü’n-nizâ‘la ibrâ eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Cemâziyelevvel li sene erba‘a ve seb‘în ve elf. Şuhûdü’l-hâl: Ramazan Efendi b. Ali, Mustafa Efendi b. Osman, Ali Beşe, Abdi Çelebi b. Hüseyin ve gayruhüm.