İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 841 Hüküm no: 1154 Orijinal metin no: [119b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merhûm Seyyid Veli’nin eşi Müşerrefe’nin diğer mirasçılarla bir davasının kalmadığı Mahmiye-i İstanbul’da Müftü Ali Çelebi mahallesi sâkinlerinden olup bundan akdem tarîk-i hâcc-ı şerîfde vefât eden Seyyid Veli b. Seyyid Nasûh’un verâseti, zevce-i metrûkesi Müşerrefe bt. Abdullah ile vâlidesi Selimeşah ve li ebeveyn er karındaşı Hüseyin Çelebi ile li üm kız karındaşları Selime ve Halime ve Server nâm hâtunlara münhasır olduğu şer‘an mütehakkik oldukdan sonra mezkûre Müşerrefe tarafından husûs-ı âti’l-beyâna vekîl olup mezbûreyi ma‘rifet-i şer‘iyye ile ârifân olan Mehmed Beşe b. Receb ve Ömer Beşe b. Abdurrahim nâm kimesneler şehâdetleri ile şer‘an vekâleti sâbite olan Abdülcelil b. Bahâaddin meclis-i şer‘-i hatîrde tereke-i müteveffâ-yı mezkûra vâzı‘u’l-yed olan merkūme Selimeşah ve Halime ve Server taraflarından zikri âtî husûsa vekîl olup ber nehc-i şer‘î ve tarîk-i mer‘î üzre vekâleti sâbite olan mezbûr es-Seyyid Hüseyin Çelebi mahzarında ikrâr ve takrîr-i kelâm edip müteveffâ-yı mezkûrun akār ve nukūd ve menkūl ve esâs-ı beyt ve evânî-i nühâsiyye ve gayr-ı nühâsiyye ve bi’l-cümle ism-i mal ıtlâk olunur cemî‘ terekesinden müvekkilem mezbûre Müşerrefe’ye bi hasebi’l-irsi’ş-şer‘î isâbet ve intikāl eden rub‘ hisse-i şer‘iyyesini mezkûrûndan taleb ve da‘vâ eylediğimde vesâtat-ı muslihîn ile da‘vâ-yı meşrûhadan mezkûrun beni on iki bin beş yüz akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr on iki bin beş yüz akçeyi mahmiye-i mezbûrede Altıpoğaca vakfından olup müvekkilem mezbûre Selimeşah’ın icâre-i mu‘accele ve müeccele-i ma‘lûmeteyn ile taht-ı tasarrufunda olup mahalle-i mezbûrede vâki‘ etrâf-ı erba‘ası Şâhin ve Altuncu Mehmed Çelebi menzilleri ve tarîk-i hâs ve tarîk-i âm ile mahdûd bir beyt-i ulvî ve tahtında bir camcı dükkânı ve beyt-i süflîyi hâvî menzili izn-i mütevellî-i vakf-ı mezbûr ile mezkûre Selimeşah’dan on iki yük beş yüz akçe bedel mukābelesinde müvekkilem mezbûre Müşerrefe tefevvüz ve kabûl ve kabz edip ol vechile müvekkilem mezbûre Müşerrefe’nin mezkûre Selimeşah’a deyni olan bedel-i mezkûr on iki bin beş yüz akçeyi takās edip ol dahi mukāssa ve kabûl eyledi ba‘de’l-yevm tereke-i mütevveffâ-yı merkūmeye müte‘allika olan cemî‘ da‘vâdan verese-i mezbûreyi ibrâ eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sânî aşer min Cemâziyelevvel li sene erba‘a ve seb‘în ve elf. Şuhûdü’l-hâl: Mustafa Efendi b. Abdünnebî, Halil Beşe b. Cuma, Yakub Beşe b. Yusuf, Hacı Durmuş b. Habîb, Hasan Çelebi b. Bayram ve gayruhüm.