İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 964 Hüküm no: 1321 Orijinal metin no: [149a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Uyvar kalesi ve diğerlerinin ele geçirilmesiyle uğraşan orduya acele olarak bakırcı, kalaycı vs. sanat ehlinden bir topluluğun gönderilmesi hususunda padişahın emri Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn, vârisü ulûmi’l-enbiyâ’i ve’l-mürselîn, hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-mu‘în Mevlânâ İstanbul kadısı -zîde fezâilühû- tevkī‘-i refî‘-i hümâyûn vâsıl olıcak ma‘lûm ola ki işbu sâl-i ferhûnde-fâlde bi inâyetillâhi te‘âlâ hısn-ı metîn olan Uyvar kal‘ası ve tevâbi‘-i kılâ‘ı kabzı tasarrufa getirilip lâkin inşâ’allâhü te‘âlâ evvel-i bahâr-ı huceste-âsârda bakiyye-i süyûf olan adüvden intikām almak ve bilâd-ı İslâmiye’ye karîb küffâr-ı dûzah-karâr yedlerinde olan kal‘aları kal‘ ve kam‘ eylemek niyeti ile sefer-i hümâyûnum kemâ-kân mukarrer ve muhakkak olmağla düstûr-ı ekrem müşîr-i efhâm nizâmü’l-âlem nâzım-ı menâzımü’l-ümem vezîr-i a‘zam ve serdâr-ı ekremim Ahmed Paşa -edâmallâhu te‘âlâ iclâlehû- ile sefer-i hümâyûnuma me’mûr olan asâkir-i zafer-encâmım için mükemmel ordu ihrâcı ve vakt ve zamânıyla gelip erişmesi ehem umûrdan olduğu ecilden, imdi mahrûse-i İstanbul’da vâki‘ ehl-i hıref tâifesinin her birinden kānûn-ı kadîm üzre mükemmel ordu ihrâcı ve defter edip defter ile tamâmen ber vech-i ta‘cîl mahrûse-i Belgrad’a irsâl ve vakt ve zamânıyla teslîm ettirmeniz bâbında fermân-ı âlî-şânım sâdır olmuşdur buyurdum ki hükm-i şerîfimle ( ) vardıkda, bu bâbda sâdır olan emrim üzre amel edip kat‘â te’hîr ve tevakkuf eylemeyip vech-i meşrûh üzre mahrûse-i İstanbul’da olan ehl-i hıref tâifesinin kānûn-ı kadîm üzre her birinden mükemmel ordu ihrâc ve defter edip defteri ile tamâmen ber vech-i ta‘cîl Belgrad’a irsâl ve vakt ü zamânıyla ordu-yı hümâyûnuma teslîm ettirip zinhâr ihmâl ve müsâhele eyleyemeyesin. El-hâsıl ordu husûsu asâkir-i İslâm’ın ziyâde ehemmindendir ana göre mukayyed olup ve sâire kıyâs olunmayıp fermânım üzre aynıyla mükemmel ordu ihrâc ve ordu ashâbın ism ü resmleri ve me’mûr oldukları hizmetleri ile ve sâkin oldukları mahallâtıyla defter edip ve defteri imzâlayıp ve mühürleyip ma‘an ordu-yı hümâyûnuma irsâl ve evvel-i bahârda hâzır ve amâde ettirip itmâm-ı hizmet-i bezl-i makdûr ve sa‘y-i nâ-mahsûr eyleyesin ve geçen sene ordu-yı hümâyûnumda kalaycı ve bakır evânî eşedd[i-i ihtiyâc], ehl-i hıref kıllet üzre olup ordu-yı hümâyûnuma müzâyaka çekdirilmeye, bu sene kalaycı ve bakırcı hırfetini dahi müstevfî ihrâc ve ma‘an yollayıp ehem-i ihtimâmda dakīka fevt eylemeyesin, şöyle bilesin alâmet-i şerîfe i‘timâd kılasın. Tahrîren fi’l-yevmi’l-hâmis aşer min Cemâziyelevvel sene erba‘a ve seb‘în ve elf. Be-makarr-ı mahrûse-i Belgrad