İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 111 Hüküm no: 55 Orijinal metin no: [14b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Esmâ bt. Derviş’in eşi Sefer Beşe’den muhâla‘a yoluyla boşandığı Mahmiye-i İstanbul’da Kule câmi‘i kurbunda Manisalı Çelebi mahallesi sâkinlerinden olup zâtı ma‘rifet-i şer‘iyye ile ârifân Mahmud b. Ömer ve Hasan Çelebi b. Mahmud nâm kimesneler ta‘rîfleri ile mu‘arrefe olan Esmâ bt. Derviş nâm hâtun meclis-i şer‘-i şerîfde zevc-i dâhili bâ‘is-i hâze’l-kitâb Sefer Beşe b. İbrahim nâm kimesne mahzarında ikrâr ve takrîr-i kelâm edip zevcim mezbûr Yusuf Beşe zimmetinde mütekarrir ve ma‘kūdun-aleyh olan bin beş yüz akçe mehr-i müeccelim ve nafaka ve iddet-i ma‘lûmem üzerlerine ve me’ûnet-i süknâm dahi kendi üzerime olup ve cihet-i karz-ı şer‘îden zimmetinde hakkım olan dört esedî guruş dahi bedel-i hul‘u olmak üzre zevcim mezbûr Sefer Beşe ile muhâla‘a-i sahîha-i şer‘iyye ile muhâla‘a edip mezbûr Sefer Beşe dahi muhâla‘a-i mezbûru kabûl eyledikden sonra hukūk-ı zevciyyete müte‘allika da‘vâdan her birimiz âharın ibrâ’-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Ahmed Beşe b. ( ), Osman Beşe el-Muhzır, Abd[i] Beşe b. ( ) ve gayruhüm mine’l-hâzırîn.