İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 264 Hüküm no: 234 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahşan bt. Abdullah’ın Eyüp’teki değirmenini Ayşe bt. Hüseyin’e sattığı Mahmiye-i İstanbul’da Demirhan mahallesinde sâkin olup zâtı ma‘rifet-i şer‘iyye ile ârifân Mehmed Çelebi b. Muslu ve Süleyman Beşe b. Hasan nâm kimesneler ta‘rîfleri ile mu‘arrefe olan Rahşan bt. Abdullah nâm hâtun meclis-i şer‘-i şerîf-i enverde medîne-i Ebâ Eyyûb-i Ensârî’de Kurukavak mahallesinde sâkine bâ‘isetü hâze’l-vesîka Ayşe bt. Hüseyin nâm hâtun mahzarında ikrâr ve takrîr-i kelâm edip mahmiye-i mezbûrede Arabacılar Meydan mahallesinde vâki‘ bir tarafdan Mesih Paşa vakfı ve bir tarafdan Derviş Mehmed Çelebi mülkü ve bir tarafdan Mehmed Çelebi vakfı ve bir tarafdan tarîk-i âm ile mahdûd iki göz mülk at değirmeni ile fırından kırk sekiz sehimden hisse-i şer‘iyyem olan on dört sehimin beş sehm-i şâyi‘ini mezbûr Ayşe Hâtun’a tarafeynden îcâb ve kabûlü hâvî şurût-ı mâni‘adan ârî bey‘-i bâtt-ı sahîh-i şer‘î ile dört yüz kırk esedî guruşa bey‘ ve teslîm ol dahi ber vech-i muharrer iştirâ ve kabûl ve tesellüm ettikden sonra semeni olan meblağ-ı mezbûr dört yüz kırk esedî guruşu mezbûr Ayşe Hâtun yedinden tamâmen ahz u kabz eyledim ba‘de’l-yevm sihâm-ı mezbûreden hisse-i şâyi‘am olan on dört sehimin beş sehm-i şâyi‘i mezbûre Ayşe Hâtun’un mülk-i müşterâsıdır, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Mehmed Efendi b. Mehmed, İbrahim Çelebi b. Ahmed, Mehmed Çelebi b. Muslu, Süleyman Beşe b. Hasan, Veli Beşe b. Muhzır, Mehmed Ağa kethüdâ-yı muhzırûn ve gayruhüm.