İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 403 Hüküm no: 410 Orijinal metin no: [107b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Sâlih’ten kız kardeşleri Hayrünnisa ve Hatice’ye miras kalan menzilin 44. yeniçeri bölüğü oda çavuşu Hasan b. Ahmed’e satıldığı Mahmiye-i İstanbul’da Mimar Sinan mahallesi ahâlîsinden iken bundan akdem vefât eden Mehmed Sâlih Efendi b. el-mevlâ el-merhûm Şeyhzâde Mehmed Efendi’nin verâseti li ebeveyn kız karındaşları Hatice ve Hayrünnisa ve li ebeveyn ammi oğlu Mehmed Takiyyüddin Çelebi’ye münhasıra olup müteveffâ-yı mezbûrun terekesinden olup zikri âtî menzilden merkūm Mehmed Takiyyüddin Çelebi hisse-i şer‘iyyesini mezbûre Hayrünnisa’ya semen-i ma‘lûme-i makbûza bey‘ ve teslîm etmekle menzil-i mezbûrun üç sehimden bir sehimi irsen ve şirâen merkūme Hayrünnisa’nın mülkü olduğu müte‘ayyin oldukdan sonra mezbûre Hayrünnisa tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân merkūm Mehmed Takiyyüddin ve Ahmed b. Mehmed nâm kimesneler şehâdetleri [ile] şer‘an sâbit olan Ahmed Çelebi b. Mehmed nâm kimesne ve mezbûre Hatice tarafından kezâlik husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Hasan Çelebi b. Abdullah ve Ali Beşe b. İbrahim nâm kimesneler şehâdetleri ile şer‘an sâbit olan Mehmed Efendi b. Ahmed nâm kimesne meclis-i şer‘-i şerîfde Dergâh-ı âlî yeniçerilerinden kırk dördüncü bölüğe mahsûs oda çavuşlarından bâ‘is-i hâze’l-kitâb Hasan Çavuş b. Ahmed nâm kimesne tarafından husûs-ı âti’l-beyâna vekîl olduğu Odabaşı Mehmed Beşe b. Muharrem ve İbrahim b. Receb nâm kimesneler şehâdetleri ile şer‘an sâbit olan Yusuf Beşe b. Hüseyin nâm kimesne mahzarında her biri ikrâr ve takrîr-i kelâm edip müvekkiletân-ı merkūmetân Hayrünnisa ve Hatice vech-i meşrûh üzre mülkleri olup mahalle-i mezbûrede vâki‘ bir tarafdan ba‘zan el-Hâc Ali vakfı ve ba‘zan Hâce Hâtun mülkü ve bir tarafdan Dudu Latif mahallesinde imâm ve müezzin olanlara meşrût vakıf menzil ve bir tarafdan Hasan Efendi oğulları mülkleri ve bir tarafdan tarîk-i âm ile mahdûd dâhiliyyesinde tabaka-i ulyâda üç bâb oda ve iki sofa ve vustâsında bir bâb oda ve süflîsinde ahır ve bir kenîf ve bir su kuyusunu ve hâriciyyesinde fevkānî üç bâb oda ve bir sofa ve tahtânî bir bâb oda ve bir matbah ve bir kiler ve bir kenîf ve hadîkayı müştemil mârrü’z-zikr menzili, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık merkūm Hasan Çavuş’a tarafeynden îcâb [108a] ve kabûlü hâvî bey‘-i kat‘î ile yüz on bin fıddî râyic fi’l-vakt akçeye bi’l-vekâle bey‘ ve teslîm ol dahi ber vech-i muharrer iştirâ ve tesellüm ettiğinden sonra semen-i mezbûr yüz on bin akçeyi bize edâ ve teslîm biz dahi otuz altı bin altı yüz altmış altı akçesini mezbûre Hatice için ve yetmiş üç bin üç yüz otuz üç akçesini mezbûre Hayrünnisa için her biri vekâlet-i mahkiyesi hasebiyle ahz u kabz eyledikde ba‘de’l-yevm menzil-i mahdûd-ı mezbûrun cümlesi merkūm Hasan Çavuş’un mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Muslu Beşe b. Mehmed, Davud Paşa mütevellîsi el-Hâc Ahmed. Yusuf Efendi el-İmâm ve gayruhüm.