İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 425 Hüküm no: 440 Orijinal metin no: [117a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Abdullah’ın Ahmed b. Durmuş’tan muhâla‘a yoluyla boşandığı Mahmiye-i İstanbul’da Keçeci Pîrî mahallesi sâkinelerinden Rahime bt. Abdullah nâm hâtun meclis-i şer‘-i şerîf-i enverde zevc-i muhâlı‘ı bâ‘is-i hâze’l-kitâb Ahmed b. Durmuş nâm kimesne mahzarında ikrâr ve takrîr-i kelâm edip zevcim mezbûr Ahmed zimmetinde mütekarrir ve ma‘kūdun-aleyh mehr-i müeccelim olan bin yedi yüz akçe ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Ahmed ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettikden sonra hukūk-ı zevciyyete müte‘allika âmme-i de‘âvîden her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Hasan Efendi b. İbrahim, Mustafa b. Ömer el-Kayyım, Mehmed b. Mustafa el-Müezzin, Hasan Beşe b. Derviş, Mehmed Çelebi b. Ali.