İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 426 Hüküm no: 442 Orijinal metin no: [117b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ahmed b. Abdullah’ın vârislerinin Mehmed b. Halil aleyhine açtıkları davada birbirlerinin zimmetlerini ibrâ ettikleri Mahmiye-i İstanbul’da Kirmasti mahallesinden sâkin iken bundan akdem vefât eden el-Hâc Ahmed b. Abdullah’ın verâseti, sulbiye kebîre kızları Râbia ve Emine ve Safiye nâm hâtunlar ile li ebeveyn er karındaşları Mustafa ve Ali nâm kimesnelere münhasıra ve asl-ı mes’elesi on sekiz sehimden olup sihâm-ı mezbûreden dörder sehimi mezbûrât Emine ve Safiye ve Râbia’dan her birine ve üçer sehimi mezbûrân Ali ve Mustafa’dan her birine isâbet ettiği şer‘an mütehakkik oldukdan sonra mezbûr Ali kendi tarafından asâleten ve mezbûrûn Emine ve Safiye ve Râbia ve Mustafa taraflarından husûs-ı âti’l-beyâna vekîl olduğu zâtlarını ma‘rifet-i şer‘iyye ile ârifân mahalle-i mezbûre sükkânından Kenan b. Abdullah ve Hasan b. Abdülmennân nâm kimesneler şehâdetleri ile şer‘an sâbit olmağla vekâleten meclis-i şer‘-i şerîf-i lâzımü’t-teşrîfde, vilâyet-i Anadolu’da Kastamonu sancağında Küre-i Nühâs kazâsı müzâfâtından İnebolu nâhiyesine tâbi‘ Nigerze nâm karye ahâlîsinden olup kendi tarafından asîl ve karındaşları gāibân ani’l-meclis Hasan ve Hüseyin taraflarından nehc-i şer‘î ve tarîk-i mer‘î üzre sâbitü’l-vekâle vekîl olan râfi‘-i hâze’l-kitâb Mehmed b. Halil mahzarında asâleten ve vekâleten ikrâr ve takrîr-i kelâm edip tereke-i müteveffâ-yı mezbûrdan olup nâhiye-i mezbûreye tâbi‘ Adarda nâm karyede vâki‘ on bir guruş kıymetli zirâ‘ı beynimizde ma‘lûm on dokuz aded kestane tahtasını bundan akdem müvekkilân-ı mezbûrân ile mezbûr Mehmed gasb ve istihlâk etmeleri ile hâlâ zikr olunan tahtaların kıymet-i şer‘iyyeleri olan on bir esedî guruşu mezbûr Mehmed asâleten ve vekâleten bana edâ ve teslîm ben dahi yedinden ahz u kabz ettiğimden sonra husûs-ı mezbûra müte‘allika âmme-i de‘âvîden mezbûr Mehmed’in ve müvekkilân-ı mezbûrân Hasan ve Hüseyin’in zimmetlerini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’t-tâsi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Receb b. Muslu, Mahmud b. Receb, Oruc b. Mustafa, Hüseyin b. Mehmed, Osman b. Ömer ve gayruhüm.