İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 527 Hüküm no: 570 Orijinal metin no: [160a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hâtun bt. Mustafa Efendi’nin Hüseyin Ağa Vakfı’na ait evdeki hissesini Ayşe Hanım’a devrettiği Husûs-ı âti’l-beyânın mahallinde ketb ü tahrîr iltimâs olunmağın savb-ı şer‘-i enverden Mevlânâ Yusuf Efendi irsâl olunup ol dahi mahmiye-i İstanbul -suyyinet ani’l-ufûl-mahallâtından Âşıkpaşa mahallesinde sâkin fahrü’l-muhadderât zahrü’l-muvakkarât Emine Hâtun bt. el-merhûm Mustafa Efendi sâkine olduğu menzile varıp zeyl-i vesîkada muharrerü’l-esâmî olan müslimîn huzûrlarında akd-i meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâd eyledikde zât-ı müşârün-ileyhâyı ma‘rifet-i şer‘iyye ile ârifân olan Fazlullah Çelebi ve Abdullah Efendi b. İsmail ta‘rîfleri ile mu‘arrefe olan mûmâ-ileyhâ Emine Hâtun meclis-i ma‘kūd-ı mezkûrda, Sinan Ağa mahallesinde sâkine umdetü’l-muhadderât zübdetü’l-muvakkarât safiyyetü’s-sıfât Ayşe Hanım bt. el-merhûm el-mebrûr ed-dâric rahmete rabbihi’l-Gafûr Mehmed Çelebi taraf-ı bâhirü’ş-şerîflerinden tefevvüz-i câ’i’z-zikri tasdîka vekîl olduğu zâtı müşârün-ileyhâyı ma‘rifet-i şer‘iyye ile ârifân olan umdetü’l-kuzâti’l-İslâm zübdetü’l-vülâti’l-enâm İbrahim Efendi b. el-merhûm Mehmed Çavuş ve mefharü’l-emâsil ve’l-akrân el-Hâc Yusuf Ağa b. Abdülmennân şehâdetleri ile şer‘an sâbit olan umdetü’l-müderrisînü’l-kirâm zübdetü’l-müdakkikīni’l-fihâm Mehmed Efendi b. el-merhûm Abdürrahim Efendi mahzarında bi tav‘ihâ ikrâr-ı sahîh ve i‘tirâf-ı sarîh-i mer‘î kılıp, merhûm Hüseyin Ağa nâm sâhibü’l-hayr vakfından icâre-i mu‘accele-i ma‘lûme ve yevmî üç akçe ücret-i müeccele ile iştirâk üzre rub‘u sâbıkan hucr ve terbiyyemde olan rabîbem müvekkile-i müşârün-ileyhâ Ayşe Hanım’ın tasarrufundan ve selâse-i erbâ‘ı benim âhar kendi mülk menzilim ve bir tarafdan yine mürtezika-i mezbûrdan Seydî Ali nâm kimesne tasarrufundan olan menzil ve taraf-ı rub‘dan tarîk-i âma müntehî fevkānî üç bâb oda ve bir sofayı ve tahtânî iki bâb oda ve bir bi’r-i mâyı ve zât-ı eşcârı müsmire ve gayr-ı müsmire hadîkayı ve havluyu muhtevî ki tûlen yirmi yedi zirâ‘ ve arzen yirmi bir zirâ‘ bi hesâb-ı terbî‘î beş yüz altmış yedi zirâ‘ menzilden hissem olan selâse-i erbâ‘ı şâyi‘a-i mezkûremi vakf-ı mezbûr mütevellîsi ma‘rifetiyle rabîbe-i [müşârün]-ileyhâ Ayşe Hanım’a otuz bin akçe bedel mukābelesinde ferâğ ve tefvîz eyledim, ol dahi ber minvâl-i meşrûh ba‘de’t-tefevvüz ve’l-kabûl bedel-i ferâğ olan ferâğ-ı mezkûr otuz bin akçeden zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hısâm ile iskāt eyledim ba‘de’l-yevm menzil-i mahdûd-ı mezkûrun mecmû‘u rabîbem müvekkile-i müşârün-ileyhâ Ayşe Hanım’ın taht-ı yedinden ve havza-i tasarrufundan, keyfe mâ yeşâ’ ve yahtâr mutasarrıfe olsunlar dediklerinde gıbbe’t-tasdîki’ş-şer‘iyyi’l-mu‘teberi’l-vicâhî vâki‘ hâli Mevlânâ-yı mezkûr mahallinde ketb ü tahrîr, ba‘dehu ma‘an ba‘s olunan Mehmed b. Ali ile mahfil-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’l-ittibâ‘ ketb ve imlâ olundu. Fi’l-yevmi’r-râbi‘ min şehri Rebî‘ilâhir li sene seb‘a ve semânîn ve elf [160b] min hicreti men lehü’l-izzi ve’ş-şeref. Şuhûdü’l-hâl: Umdetü’l-müderrisînü’l-kirâm Abdülkerim Efendi b. el-merhûm Mustafa Efendi, zübtetü’l-müdakkikīni’l-fihâm Mustafa Efendi, umdetü’l-müderrisînü’l-kirâm Mehmed Efendi b. el-merhûm Abdürrahim, mefharü’l-emâcid el-Hâc Yusuf Ağa b. ( ), umdetü’l-kuzâti’l-İslâm İbrahim Efendi b. Mehmed Çavuş ve gayruhüm.