İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 602 Hüküm no: 662 Orijinal metin no: [191b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Seyyid İbrahim Efendi’nin çukadâr Osman Beşe’ye olan borcunun kefillerinden tahsili Mahmiye-i İstanbul’da Harâccı Muhyiddin mahallesi sâkinlerinden olup sâbıkan Yenişehir kadısı olan a‘lemü’l-ulemâ’i’l-izâm efdalü’l-fuzalâ’i’l-fihâm Mehmed Efendi’nin çukadârı olan Osman Beşe b. İskender nâm kimesne tarafından husûs-ı âti’l-beyâna vekîl olduğu mahalle-i mezbûre sâkinlerinden Ali Çelebi b. Mustafa ve Süleyman Çelebi b. Hasan nâm kimesne meclis-i şer‘-i şerîfde sâbıkan Halomiç kadısı iken bundan akdem vefât eden es-Seyyid İbrahim Efendi’nin sulbî oğlu eş-Şeyh es-Seyyid Mehmed Efendi mahzarında üzerine da‘vâ ve takrîr-i kelâm edip müteveffâ-yı mezbûr es-Seyyid İbrahim Efendi hayâtında müvekkilim merkūm Osman Beşe yedinden bi tarîki’l-karz ahz u kabz eylediği yüz kırk guruşa merkūm eş-Şeyh es-Seyyid Mehmed Efendi ile gāib ani’l-meclis nâm kimesne ale’l-iştirâki’s-seviy tarafeynden emir ve kabûlü hâviye kefâlet [192a] ile kefîl olduklarından sonra meblağ-ı mezbûru kable’l-edâ merkūm es-Seyyid İbrahim Efendi fevt olmağla mezbûr eş-Şeyh es-Seyyid Mehmed Efendi kefâletine binâen meblağ-ı mezbûrdan üzerine edâsı lâzım gelen yetmiş guruşun bundan akdem yirmi guruşunu bana edâ ve teslîm ben dahi ahz u kabz edip elli guruşu bâkī kalmışdı hâlâ merkūm eş-Şeyh es-Seyyid Mehmed Efendi’ye suâl olunup meblağ-ı bâkī-i mezbûru dahi kefâletine binâen bana teslîme tenbîh olunmak matlûbumdur dedikde gıbbe’s-suâl merkūm eş-Şeyh es-Seyyid Mehmed Efendi kaziyye minvâl-i muharrer üzre olduğunu bi tav‘ihî ikrâr ve i‘tirâf etmeğin mûcebince meblağ-ı bâkī-i mezbûr elli guruşu müdde‘î-i mezbûr Ahmed Ağa’ya kefâletine binâen edâ ve teslîme merkūm eş-Şeyh es-Seyyid Mehmed Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelevvel li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Ali Çelebi b. Mustafa, Süleyman Çelebi b. Hasan, Osman b. Ömer, Ebûbekir b. Hüseyin, Mehmed b. Mehmed ve gayruhüm.