İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 91 Hüküm no: 61 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Hüseyin’in çocuğu Mehmed için boşandığı kocası Ahmed Beşe b. Receb’den nafaka talebi Mahmiye-i İstanbul’da Debbâğzâde mahallesinde sâkine bâ‘iset-i hâze’l-kitâb Saliha bt. Hüseyin nâm hatun meclis-i şer‘-i şerîf-i enverde takrîr-i kelâm ve ta‘bîr ani’l-merâm edip zevc-i muhâli‘i işbu hâzır bi’l-meclis Ahmed Beşe b. Receb’in firâşından hâsıl ve benden mütevellid sadrî sagīr oğlum ve hâlâ bi-hakkı’l-hıdâne hacr u terbiyemde olan Mehmed’in nafaka ve kisvesi için babası mezbûr Ahmed Beşe üzerine kadr-ı ma‘rûf akçe farz ve takdîr olunmak matlûbumdur dedikde hâkim-i muvakkı‘-ı sadr-ı kitâb tûbâ leh ve hüsnü-meâb hazretleri dahi sagīr-i mezbûrun nafaka ve kisvesi için babası mezbûr Ahmed Beşe üzerine târih-i kitâbdan yevmî beşer akçe nafaka farz ve takdîr edip meblağ-ı mefrûz-ı mezbûru sagīr-i mezbûra harc u sarfa lede’l-iktizâ istidâne ve inde’l-zafer babası mezbûr Ahmed Beşe üzerine rücû‘a mezbûre Saliha Hâtûn’a izin verilmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilka‘de li-sene tis‘a ve tis‘în ve elf. Şuhûdü’l-hâl: İbrahim Çelebi b. Ahmed, Hüseyin Çelebi b. Mustafa, Mehmed b. ( ) Efendi ve gayruhüm.