İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 172 Hüküm no: 185 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Karaman’da kürkçü olan Hero v. Sadelko ile ortağı Sifri v. Gogaz’ın ortaklıklarına son vermeleri Mahmiye-i İstanbul’da Küçük Karaman’da kürkçü olan Hero v. Sadelko nâm zimmî meclis-i şer‘-i şerîf-i enverde yine tâife-i mezbûreden Sıfri v. Gogaz nâm zimmî muvâcehesinde takrîr-i kelâm edip mezbûr Sıfri ile ben kürkçülük san‘atında şerîkler olup hâlâ fesh-i akd-i şirket edip beynimizde hesâb gördüğümüzde mezbûrun benim zimmetimde elli guruş hakkı zuhûr etmekle ben dahi meblağ-ı mezbûr mukābelesinde kendi mâlımdan mezbûr Sıfri’ye bir köhne sincab kürk ve üç parça semmûr paçası kürkümü ve dokuz aded kuzu kürkümü def‘ ve teslîm, ol dahi ahz u kabz ve istîfâ eylediğinden sonra zikr olunan Karaman sûkunda vâki‘ kürkçü dükkânında gediğimi dahi mezbûr Sıfri’ye ferâgat edip husûs-ı mezbûra ve târih-i kitâba gelince beynimizde cereyân eden ahz u i‘tâya müte‘allika âmme-i da‘vâdan herbirimiz âharın zimmetini ibrâ-i âm ile ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-hâmis min-Saferi’l-hayr li-sene mi’e ve elf. Şuhûdü’l-hâl: İbrahim Çelebi b. Ahmed, Ali b. Bâli, Mehmed Efendi b. Ahmed, Abdurrahman Çelebi b. Hüseyin, Abdurrahman b. Abdullah.