İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 647 Hüküm no: 505 Orijinal metin no: [168b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Süleyman Evkafı’ndan olan Langa-i kebir ve Yedikule’deki bahçe ve bostanların kiracılarına ait bargirlerin başkaları tarafından ücretsiz kullanılamayacağı Akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn râfi‘ü i‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kadısı -zîde fezailehû- tevkī‘-i refî‘-i hümâyûn vâsıl olucak ma‘lûm ola ki, mahrûse-i İstanbul’da vâki‘ merhûm ve mağfûrun-leh Sultân Süleyman Han -tâbe serâhu- Evkāfı’ndan Langa-i kebîrdeki bahçe ve Yedikule’de olan bostan ve bahçelerin bostancı ve bahçevânları südde-i sa‘âdetime arzuhâl edip bunlar vakf-ı merkūmun bahçe ve bostanlarının müste’cirleri olup vakfa âid olanı edâ edip bir vechile dahl olunmak îcâb etmez iken ba‘zıları dolap bargirlerin fuzûlî ahz ve bilâ-ücret cebr emriyle taşıdıp te‘addî etmeleriyle bu makūle bid‘at ref‘ olunmak üzere bundan akdem emr-i şerîf verilmeğin yine vech-i meşrûh üzere te‘addî olunduğun bildirip ol bâbda hükm-i hümâyûnum recâ eyledikleri ecilden ahkâm kuyûduna mürâca‘at olundukda vech-i meşrûh üzere emr-i şerîf verildiği mastûr ve mukayyed bulunmağın bilâ-ücret mezbûrların bargirleri istihdâm olunmamak emrim olmuşdur buyurdum ki, [169a] vusûl buldukda bu bâbda sâdır olan emrim üzere amel edip dahi bir def‘a şer‘le görülüp fasl olunmayan husûsu tamam tekayyüd edip göresin, i‘lâm olunduğu üzere ise ol bâbda muktezâ-yı şer‘-i kavîmle amel edip dahi mezbûrların bargirleri bilâ-ücret istihdâm olunmayıp şer‘-i şerîfe ve mukaddemâ ve hâlen verilen evâmir-i hümâyûnuma muhâlif kimesneye iş etdirmeyesin, şöyle bilesin, alâmet-i şerîfe i‘timâd kılasın. Tahrîren fî evâsıtı şehri Recebi’l-ferd li-sene seb‘a ve mie ve elf. Be-makām-ı Kostantıniyye el-mahrûse.