İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 703 Hüküm no: 541 Orijinal metin no: [185b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yirmi beş bin guruşun hazineye teslim edilmek üzere Nuh Ağa’ya verilmesi hususunda Mehmed Kethudâ’nın mektubu Vezîrim muhterem izzetlü ve rif‘atlü kāimmakām paşa hazretleri, derûn-ı mektûbda tahrîr olunan akçeler kalyonlar mesârifi için vezîrim kapudan paşa hazretlerine havâle olunmağla bir gün mukaddem tahsîl ve ta‘allül-i mîr-i muhterem edenleri habs ve alıvermekde ihtimâm eyleyeler deyü buyruldu. İzzetlü ve sa‘âdetlü mükerremetlü karındaşım sultânım hazretlerinin huzûr-ı izzet-mevfûr-ı ma‘âlî ve kusûrları savbına mezîd-i ta‘zîm ile dürer-i da‘avât-ı hâlisât-ı muhabbet-füzûn ve gurer-i teslîmât-ı vâfiyât-ı meveddet-nümûn ithâfından sonra zamîr-i münîr-i hurşîd-tenvîrlerine müntehâ-yı muhlis-i dîrîneleri budur ki hâl ü hâtırları tefahhus ve cümleye takdîm olunur. Hemîşe Hüdâ-yı müte‘âl hazretlerinin hıfz-ı emânında ber-karâr-ı ömr olasız. Cânib-i mahlasları ahvâlinden tefahhus olunmak lâyık buyurulur ise bi-hamdillâhi te‘âlâ vücûd-ı hâk-âlûdumuzu dâire-i sıhhat ve sahrâ-yı selâmetde mevcûd bilesiz. Fîmâ-ba‘d benim sa‘âdetlü karındaşım bundan akdem devletlü kapudan paşa hazretleri taraflarına teslîm olunmak üzere devletlü sultânım efendimize kethudâları sa‘âdetlü karındaşımız Mehmed Efendi iki bin beş yüz guruş polise olunmuş idi. Mektûblarımız cenâbınıza dâhil olmazdan mukaddem meblağ-ı mezbûr kapudan paşa hazretlerine teslîm olunmuş bulunur ise beher hâl kapudan paşa hazretlerinden temessük alınmışdır. Ol temessükü sa‘âdetlü kapıcıbaşı Nuh Ağa’ya gösteresiz ki deynimize geçireler ve Şâtır Ahmed Ağa’da olan yedi bin beş yüz guruş ve sonra sâ‘î yediyle cenâbınıza polise olunan on beş bin guruş ile üç madde yirmi beş bin guruş olur. Zikrolunan yirmi beş bin guruşu bilâ-tevakkuf sa‘âdetlü karındaşımız Kapıcıbaşı Nuh Ağa’ya teslîm eyleyesiz. Zîrâ hazîne bu akçeler ile tamam olacakdır. Hâliyâ Kilârcı Ali ile gönderilen gerek devletlü Paşa efendimiz hazretlerinin mektûbunda ve gerek bu muhlislerinin mektûbunda böylece tasrîh olunmuşdur. İmdi benim karındaşım Mehmed Efendi karındaşımızda olan iki bin beş yüz guruş ve Şâtır Ahmed Ağa’da olan yedi bin beş yüz guruş ve cenâbımıza polise olunan on beş bin guruş ile mecmû‘u yirmi beş bin guruş Nuh Ağa karındaşımıza teslîm eyleyesiz. Bâkī izz-i rif‘at dâim-bâd Muhlis-i muhib Mehmed Kethudâ. Hüccet-i mezkûra fîmâ-ba‘dehû fermân-ı âlîşân mûcebince zahriyedir. Bi’l-fi‘il kapudan olan düstûr-ı mükerrem müşîr-i müfahham râkib-i hubûlü’l-ferd ve’l-ikbâl sahib-i zübûlü’l-mecd ve’l-iclâl sa‘âdetlü el-Hâc Hüseyin Paşa taraf-ı bâhirü’ş-şereflerinden husûs-ı âti’z-zikre vekîl olduğu hâlâ Tersâne-i âmire emîni umdetü’l-emâcid ve’l-a‘yân Yusuf Efendi b. Mustafa ve Halil Ağa b. Mustafa şehâdetleriyle şer‘an sâbit olan Kalyonlar Kâtibi Hasan Efendi b. Abdullah huzûr-ı kāimmamakām-ı hazret-i sadrazamîde ma‘kūd-ı meclis-i şer‘-i şerîf-i enverde hâlâ cezîre-i Kıbrıs muhâfazasında olan vezîr-i mükerrem Hüseyin Paşa hazretlerinin yeğeni umdetü’l-emâcid ve’l-a‘yân Yusuf Bey b. Mehmed mahzarında ikrâr-ı tâm ve takrîr-i kelâm edip işbu bin yüz yedi senesine mahsûb olmak üzere yirmi beş bin guruş ta‘yîn ve havâle olunmağla meblağ-ı mezbûr yirmi beş bin guruşu cezîre-i mezbûre muhâfızı müşârün-ileyh Hüseyin Paşa dahi mal-ı mezbûrdan ba‘de’t-tahsîl müvekkilim müşârün-ileyh tarafına teslîm için yeğeni işbu mûmâ-ileyh Yusuf Bey’e irsâl ve teslîm etmekle mûmâ-ileyh Yusuf Bey dahi bâ-fermân-ı âlî meblağ-ı mezkûr yirmi beş bin guruşu mesârif-i merkūme için bana teslîm ben dahi yedinde bi’t-tamam vekâletim hasebiyle ahz u kabz ve tesellüm eyledim min-ba‘d meblağ-ı mezbûr yirmi beş bin guruşdan bir habbe bâkī kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-Zilka‘deti’ş-şerîfe li-sene seb‘a ve mie ve elf. Şuhûdü’l-hâl: Umdetü’l-emâcid ve’l-a‘yân Yusuf Efendi Emîn-i Tersâne, Umdetü erbâbü’t-tahrîr ve’l-kalem Yusuf Efendi Tezkire-i evvel, Zübdetü ashâbi’t-tastîr ve’r-rakām Hâfız Efendi Tezkire-i sânî, Fahrü’l-akrân Mehmed Ağa Ser Çavuşân, Salih Bey b. Muharrem, Ali Ağa b. Salih, İmâm Abdülaziz Efendi, Osman Ağa b. İbrahim, Receb Efendi nâib-i kapan, Mustafa Efendi nâib-i recül.