İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 38 Hüküm no: 2 Orijinal metin no: [1a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayram gecelerinde akşam namazından sonra kandillerin yakılması Evkāf-ı selâtîn-i izâm ve vüzerâ-yı kirâm cevâmi‘ mütevellîleri leyâlî-i a‘yâdı ta‘zîm ve ihyâ için Mekke-i Mükerreme ve Medîne-i Münevvere -şerrefehallâhü te‘âlâ ilâ yevmi’l-âhıre- ve Kudüs-i Şerîf ve Mısır-ı kahire ve Şam-ı cennet-meşâm ve Halebü’ş-şehbâ ve umûmen bilâd-ı Arabistan[’da] vâki‘ cevâmi‘-i şerîfe minârelerinde ba‘de’l-ışâ îkād-ı kanâdîl olunmak mu‘tâd-ı kadîm olduğunu, bu âdet-i müstahseneye ittibâ‘ ile îd-i şerîfe ta‘zîm kasd olunmak mertebe-i vücûbda olmağla inşâ’allâhü te‘âlâ fîmâ ba‘d İstanbul ve Galata ve Eyyûb ve Üsküdar’da vâki‘ selâtîn-i izâm ve vüzerâ-i kirâm cevâmi‘-i şerîfesi minâreleri leyâlî-i a‘yâdın ancak ibtidâ gecesi kanâdîl ile tezyîn olunup lâkin tezyîn olunan kanâdîl leyâlî-i Ramazân’da tezyîn olunduğu gibi olmayıp şerefelerin kanâdîli resm-i âhar üzre tertîb ve şerefelerinden aşağı kandiller ve buna dâir âvîzeler ile tezyîn ve mahyaların her biri, hâzâ bayram ve îd-i şerîf ve îd-i mübârek ve îd-i sa‘îd ve bu misillü terkîb ile resm olunmak fermân olmağın imdi işbu îd-i şerîfin ibtidâ gecesi ba‘de’l-ışâ fermân olunduğu vech üzre mübâşeret ve bundan sonra dahi leyâlî-i a‘yâdın ibtidâ gecelerinde bu vechile hareket etmeleri için mütevellîleri olduğunuz cevâmi‘-i şerîf kayyımlarına tenbîh ile tefhîm eyleyesin deyû buyruldu. 24 Ramazân sene 1128. [Derkenâr:] Bin yüz on dört senesi târihinde kürklere verilen nizâm defteri es-Seyyid Mahmud Efendi merhûmun sicilinde mukayyeddir. Sah.