İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 195 Hüküm no: 111 Orijinal metin no: [35a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’daki çamaşırcı esnafının nizamlara uymaları gerektiği fermanı Akzâ kuzâtü’l-müslimîn evlâ vülâtü’l-muvahhidîn ma‘denü’l-fazli ve’l-yakīn râfi‘-i a‘lâmi’ş-şerî‘ati ve’d-dîn vâris-i ulûmü’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în Mevlânâ İstanbul kadısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki İstanbul’da vâki‘ câmeşûycu esnâfının kethüdâları Mustafa ve yiğitbaşı ve ihtiyârları ma‘rifetleriyle ba‘de’l-yevm fukarâ ve zu‘afâya enfa‘ olmak üzre esbâblarını pâk yıkayıp ve beynlerine kefere ve hâm-dest ve üstâda hizmet etmeyip kethüdâlarının ma‘rifeti olmadıkça dükkân ihdâs etmemek üzre kadîm olan ustalar birbirlerine kefîl ve mezbûrûna dahi kethüdâları merkūm Mustafa tekeffül eylediklerin ma‘lûmü’l-esâmî olan ustalar kethüdâları mezbûr Mustafa ve yiğitbaşı ve ihtiyârları ma‘rifetleriyle ba‘de’l-yevm ibâdullâhın esbâbını pâk yıkayıp ve beynlerinde nizâm-ı kadîme muhâlif hareket etmemek üzre mezbûrûna taraf-ı şer‘den tenbîh ve tescîl-i şer‘î olundukdan sonra mezbûrûn dahi râzı ve müte‘ahhid ve bu nizâm düstûrü’l-amel kılınmak üzre emr-i şerîfim verilmek için sen ki Mevlânâ-yı mûmâ-ileyhsin imzân ile mümzâ ale’l-esâmî defter ile i‘lâm eylediğin ecilden imdi işbu nizâm düstûrü’l-amel kılınıp hilâfına hareketden ihtirâz eyleyeler deyû fermân-ı âlîşânım sâdır olmuşdur. Buyurdum ki hükm-i şerîfim vardıkda bu bâbda sâdır olan emrim üzre amel edip dahi esnâf-ı mezbûrun müte‘ahhid oldukları nizâm fîmâ ba‘d düstûrü’l-amel kılınıp, hilâfına vaz‘ olunmakdan ziyâde ihtirâz ve ictinâb eyleyesin. Şöyle bilesin, alâmet-i şerîfe i‘timâd kılasın. Tahrîren fi’l-yevmi’l-hâmis Zilhicce sene semân ve selâsîn ve mi’e ve elf. Be makām-ı Kostantıniyye el-mahrûse.