İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 274 Hüküm no: 188 Orijinal metin no: [57b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi’nin Davudpaşa mahallesindeki fırınında pişirdiği ekmekleri satmasına müdahale olunmaması Ma‘rûz-ı dâ‘îleridir ki Mahmiye-i İstanbul’da Davudpaşa iskelesi kurbunda Sultân Bayezid-i cedîd mahallesinde Etyemez tekyesi kurbunda sâkin sâhib-i arzuhâl Mustafa Efendi meclis-i şer‘de benim taht-ı tasarrufumda olup Davudpaşa mahallesinde vâki‘ somuncu fırınımda tabh olunan hâssü’l-hâs nân-ı azîzimiz tekye-i mezbûre karşısında vâki‘ taht-ı tasarrufumda olan bakkal dükkânı köşesinde bey‘ murâd eylediğimde ashâb-ı ağrâzdan ba‘zı kimesneler bî-vech müdâhale ve mu‘âraza ederler mahall-i mezbûrda ekmekçi fırını ve iskemlesi olmayıp gāyet ba‘îd olmağla ol havâlîde olan ibâdullâh eyyâm-ı şitâda usret çekmeleriyle fırın-ı mezbûrdan nân-ı azîz getirilip dükkân-ı mezbûrda bey‘ olunmasını taleb ederler dedikde hakīkat-i hâl mezbûr Mustafa Efendi’nin takrîr-i meşrûhu üzre olduğunu vukūfu olan bî-garaz müslimîn ihbâr etmekle mezbûr Mustafa Efendi’nin fırın-ı mezkûrunda tabh olunan nân-ı azîzi dükkân-ı merkūmda bey‘ine bî-vech mümâna‘at olunmamak üzre izin verildiği tescîl-i şer‘î olundu. El-emru li men lehü’l-emr. Fî 3 Saferi’l-hayr sene [1]139. Bâ sah İşbu verilen nizâm mûcebince düstûrü’l-amel kılınıp hilâfıyla bir ferd vaz‘ u hareket eylemeye deyû buyruldu.