İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 227 Hüküm no: 218 Orijinal metin no: [99-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremde zarar gören Sultan Ahmed Camii Vakfı’na ait Atmeydanı’ndaki değirmende hasar tespiti için keşif yapılması Sultân Ahmed kurbünde keşf-i değirmen Ma‘rûz, Merhûm Sultân Ahmed Han Câmi‘-i şerîfi Vakfı’ndan Atmeydanı başında kubbeler altında vâki‘ iki horos değirmenin müsteciri arzuhâl eden es-Seyyid Mustafa ve es-Seyyid Mehmed meclis-i şer‘-i hatîrde mezkûr değirmenin mutasarrıfesi Âişe Hatun tarafından vekîli Hoca Kasım Ağa ile terâfu‘larında müsteciri olduğumuz değirmenin zelzeleden kubbe ve kemerleri inhidâma mâil olup i‘mâl olmamağla mutasarrıfesi mezbûre bu âna dek ta‘mîr etmemekle ta‘mîr eylesin veyâhud fesh-i icâre ederim dedikde vekîl-i mezbûr dahi kubbeleri ta‘mîr mümkün olmayıp müceddeden binâsı iki bin guruşdan ziyâde masrafa muhtâc olmağla müvekkilemin kudreti yokdur eğer kubbeleri hedm olunup sakfı ahşabdan binâya müsâ‘ade olunursa ol vechile ta‘mîr ederim dedikde sâdır olan fermân-ı âlîleriyle taraf-ı dâ‘îlerinden ve Haremeyn-i muhteremeyn müfettişi efendi dâ‘îleri tarafından mi‘mâr halîfeleri ma‘rifetleriyle rü’yet olundukda kubbelerinde halel olmayıp ancak kemerler rahnedâr olmağla kubbeleri kalıba alınıp kemerlerinin iki yanı ve üç ayakları tecdîd olunursa kābil-i isti‘mâl olunur deyü haber verdikleri bi’l-iltimâs huzûr-ı âlîlerine i‘lâm olundu. Fî 11 Safer sene 1180.