İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 266 Hüküm no: 274 Orijinal metin no: [123-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Börekçi Ali’nin kölesi Zenci Ali’nin hürriyetini ispat etmesi İsbât-ı hürriyet Ma‘rûz, Rıkka inkıyâdı sebk etmekle kıbel-i şer‘-i şerîfden vech-i âtî üzere da‘vâya mezûn olan açık kaşlı kara gözlü orta boylu arzuhâl eden Ali nâm Zenci meclis-i şer‘-i hatîrde kendüye rıkk üzere vaz‘-ı yed eden Borekçi Ali b. el-Hâc Ahmed mahzarında ben Abdülcelilzâde Hüseyin Paşa’nın mu‘takları olan Mehmed b. Abdullah nâm zencinin firâşından hâsıl ve zevcesi Âişe bt. Abdullah nâm zenciden Payas kurbünde Uzeyr kasabasında mütevellid hürrü’l-asl olup on beş ve yirmi seneden beri Anadolu’da ve Rumeli’nde Hayrabolu’da ve gayrı mahâllerde harbendelik edip bundan akdem İslambol’dan yine Hayrabolu’ya giderken Çekmece bayırlarında gāib ani’l-meclis Süleyman nâm kimesne beni ahz ve refîkimi âlet-i harb ile cerh ve beni istirkāk murâd etdikde ben dahi râzı olmamamla beni kerh ü ihâfe ve darb edip Lala Paşa çekdirisine götürüp bir müddet habsetdikden sonra işbu hâzır bi’l-meclis Sakā Yusuf ma‘iyyetiyle Esirci İbrahim’e bey‘, ol dahi yirmi gün mukaddem işbu mezbûr Börekçi Ali’ye yüz kırk guruşa bey‘ etmekle mezbûr Börekçi Ali dahi abd olmak zu‘muyla beni istirkāk murâd eder. Suâl olunup sebîlim tahliye olunmak matlûbumdur deyü da‘vâ, mezbûr Börekçi Ali dahi cevâbında müdde‘î-i mezbûru vech-i meşrûh üzere mezbûr Esirci İbrahim’den iştirâ eylediğini ikrâr ve hürriyetini inkâr etmeğin müdde‘î-i merkūm hürriyetini Atpazarı’nda Kahveci İsmail b. Abdullah ve Kazgancı Salih b. Hasan ve Mehmed Odabaşı b. Mustafa ve [124] ve Beylik harbendelerden Ahmed b. Mustafa ve Mustafa b. Mehmed ve İbrahim b. Mehmed ve İsmail b. Osman ve diğer Mustafa b. Mehmed nâm kimesneler şehâdetleriyle alâ-vechi’ş-şöhret ve’t-tevâtür isbât etmeğin mûcebiyle mezbûr Zenci Ali’den mezbûr Börekçi Ali kasr-ı yed ve sebîlî tahliye olunmak iktizâ eylediği ber-mûceb-i fermân-ı âlî huzûr-ı âlîlerine i‘lâm olundu. Fî 3 şehri Rebî‘ülevvel sene 1180.