İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 341 Hüküm no: 390 Orijinal metin no: [166-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merzifonlu Kara Mustafa Paşa Vakfı’nda sığır salhanesinden Yahudi kasaplara verilen hisseden mahlûl oldukça vakıf defterine kaydolunması Yahûdî tâifesinden sığır kasabları nizâ‘ı Ma‘rûz, Bu dâ‘îlerine hitâben sâdır olan fermân-ı âlîlerine imtisâlen derûn-ı arzuhâlde ve hâmişinde mastûr kasabbaşı ağa kullarının takrîrinde olan husûs rü’yet olundukda Merzifonî merhûm Mustafa Paşa’nın Vakfı olan sığır salhânelerinden sekizinci salhâneden bâ-hatt-ı hümâyûn-ı şevket-makrûn Yahûd tâifesine her yüz sığırda altı sığır hisse verilegelip ve hisse-i mezkûreden müctemi‘ olan sığırlar Balat’da ve Hasköy’de ve sâir Yahûd mütemekkin olduğu emâkinde vâki‘ dükkânlarda vaz‘ ve bey‘ olunagelip ve merkūm dükkânların [167] gedikleri ber-mûceb-i vakfiye ve bâ-fermân-ı âlî vakfa hâsıl kayd ve ferâğ ve intikāl ve mahlûlleri defter-i vakfa tahrîr ve temessük verilip ol vakitden beri amel olunagelmekle hisse-i mezkûreden müctemi‘ olan bakarların bey‘ine tahsîs olunan dekâkînden kasabbaşı ağa i‘lâmında mezkûr tahdîd olunan ( ) bâb dükkân mahlûl olup Yahûdî kasablarının ba‘zıları hîlelerinden nâşî ketm ü ihfâ ile taraf-ı vakıfdan temessük almamalarıyla hilâf-ı şart-ı vâkıf hareketlerine Kasablar Kethüdâsı Mehmed ve diğer Mehmed ve es-Seyyid Mustafa ve Osman ve el-Hâc Abdi ve Bekir ve Yahûdî kasabları ustaları haber vermeleriyle sâlifü’z-zikr altı hisseye ziyâdelik gelmemek şartıyla ancak hisse-i mezkûreden müctemi‘ olan bakarlardan kasabbaşı ağa kullarının takrîrinde tahdîd eylediği dört mahâlde dört dükkâna öteden beri veregeldikleri hisse ile sâir gedikler misillü defter-i vakfa kayd ve sâhibleri yedlerine temessük verilmek üzere fermân-ı âlîleri sudûrunu istid‘â eyledikleri huzûr-ı âlîlerine i‘lâm olundu. Fî 22 Rebî‘ülevvel sene [11]80.