İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 352 Hüküm no: 406 Orijinal metin no: [173-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mekrili Yani’nin gemisine Karaağaç İskelesi’nden buğday yükleyerek İstanbul’a götürmesine engel olunmaması Ma‘rûz, Kapan reislerinden arzuhâl eden Mekrili Yani v. Sotiri arzuhâlinde tahrîr etdiği vech üzere yedi bin keyl hınta alırvulık? sefînesiyle Akdeniz tarafında Gümülcine kazâsında kendi sermâyesiyle ol mikdâr hınta iştirâ ve ol havâlîde Karaağaç İskelesinde tahmîl ve doğru Kapan’a getirmek şartıyla fermân-ı âlîleri sudûrunu istid‘â etmekle reisler kethüdâsı el-Hâc Hasan ve sâir rüesâdan mazbûtü’l-esâmi kimesneler irsâl ve mesfûrun kapanda olan gemisi irâet olundukda sekiz bin keyl hıntaya mütehammil olup lâkin Akdeniz seferine ancak yedi bin keyl tahmîl olunur deyü ihbâr ve mesfûrun mezkûr iskeleden yedi bin keyl hınta tahmîl ve habbesi izâ‘at olunmayarak doğru Âsitâne’ye gelmek üzere nefsine Kapan tüccârından Tığlıoğlu Salih ve Üçdirekli reisi Galatalı Manolaki sefîne sâhibi Mumcu Manol kefil olmalarıyla vech-i muharrer üzere mesfûrun zikr olunan iskeleden ol mikdâr hınta tahmîline kimesne mümâna‘at etmeyip ve ol mikdâr hınta tahmîl olunduğu arz u i‘lâm eylemen bâbında Gümülcine nâibi efendiye ve zâbitlerine hitâben fermân-ı âlîleri buyrulur ise ol bâbda emr ü fermân hazret-i men-lehü’l-emrindir. Fî-gurreti Cumâdelûlâ sene 1180.