İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 391 Hüküm no: 468 Orijinal metin no: [197-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papasoğlu Hanı’nın Mimar Ağa gözetiminde bir an önce tamir olunması Papasoğlu Hanı ba‘de’l-keşf mi‘mâr ağaya havâle Ma‘rûz, Nezâret-i dâ‘îlerinde olan evkāfdan arzuhâlde mezkûr Papasoğlu Hanı demekle ma‘rûf han sâdır olan fermân-ı âlîlerine imtisâlen ta‘mîrât ve termîmât ve keşf ü tahmîn olundukda mi‘mâr ağa kulları defteri mantûkunca bin yedi yüz elli dört buçuk guruşa bâliğ olmağla defter-i mezkûrda münderic olduğu vech üzere odaların masârıfı olan sekiz yüz yetmiş dört guruşunu bi’l-icâreteyn mutasarrıfları mu‘accelelerine mahsûben mallarından ta‘mîr ve ulyâsında olan dehliz kubbe ve kavislerine iktizâ eden üç yüz yirmi altı guruş ve süflâda mahzenler önünde kezâlik dehliz kubbe ve kavislerine iktizâ eden beş yüz altmış dört guruş ki cem‘an sekiz yüz doksan guruşun ancak üç yüz guruşunu taraf-ı vakfa i‘ânet için ashâb-ı arzuhâl bazergânlar mallarından teberru‘an ve bâkī beş yüz doksan guruşu taraf-ı vakıfdan sarf olunmak üzere rızâlarıyla mukāvele etmeleriyle han-ı mezkûr zehâir-i ibâdullah için mu‘ad olan mahâlden olup icâleten ta‘mîri muktezî olmağla ümenâ-yı Devlet-i aliyye’nin biri yâhud mi‘mâr ağa kulları ma‘rifetiyle vech-i meşrûh üzere ta‘mîr ve tekmîl olunması ashâb-ı arzuhâl istid‘â eyledikleri iltimâslarıyla huzûr-ı âlîlerine i‘lâm olundu. Fî 12 Cemâziyelâhire sene 1180.