İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 393 Hüküm no: 473 Orijinal metin no: [198-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapan gemilerinden otuz sehim hisseye sahip olan İbrahim Yazıcı’nın firarı nedeniyle hissesine kayyım tayin olunması Kapan sefînelerinden otuz sehim hisseye mutasarrıf İbrahim Yazıcı firâr etmekle Ma‘rûz, Hâlâ Galata’da kalafat yerinde merbût şayka ta‘bîr olunur on yedi zirâ‘ sefîne yüz yirmi sehim i‘tibârıyla kırk sehmi Kapan tüccârından sâhib-i arzuhâl el-Hâc İsmail’in ve on sehmi Makaracı el-Hâc İbrahim’in ve kırk sehmi Salih Ağa’nın ve otuz sehmi es-Seyyid İbrahim Yazıcı’nın, lâkin mezbûr es-Seyyid İbrahim Yazıcı bundan akdem firâr edip hayâtı ve memâtı ma‘lûm olmamağla hâli mütebeyyin oluncaya değin bir kayyım nasb olunup gerek sefînede hisse-i mezkûresi ve gerek sâir emvâl ve eşyâsı hıfz olunmak lâzım gelmekle mezbûr el-Hâc İsmail kayyım nasb olunmuş idi. Hâlâ sefîne-i mezkûre kapan sefâininden olup zahîre celbi için Karadeniz’e teseyyür iktizâ etmekle sefîne-i mezbûre takvîm olunup mefkūd-ı mezkûrun hissesinin kıymeti ifrâz ve ta‘yîn olunmasını kayyım-ı mezbûr azruhâliyle istid‘â etmeğin sâdır olan fermân-ı âlîlerine imtisâlen [199] kıbel-i şer‘den mürsel kâtib Numan Efendi dâ‘îleri sefîne-i mezkûre üzerine varıp kapan tüccârından ve sâir sefîne ahvâline vukūfu olan Müslimînden istihbâr eyledikde sefîne-i mezkûrenin âlât-ı mevcûdesiyle el-yevm kıymeti olan iki bin dört yüz guruş olup ve kıymet-i mezkûre üzere mefkūd-ı mezkûrun hissesi olan altı yüz guruş değer ziyâdeye tahammülü yokdur deyü ihbâr ve takvîmleri mezbûr dâ‘îleri mahâllinde ba‘de’t-tahrîr ümenâ-yı şer‘le gelip inhâ eylediği bi’l-iltimâs huzûr-ı âlîlerine i‘lâm olundu. Fî 11 C sene 1180.