İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 399 Hüküm no: 482 Orijinal metin no: [202-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehri Hatun’un, Şeyh karyesindeki çiftliğin eski kethüdasına teslim etmiş olduğu eşya ve hayvanları geri alması Çiftlik kethüdâsından taleb-i eşyâ Ma‘rûz, Sultân Selim Câmi‘-i şerîfi kurbünde sâkine muhadderâtdan Mehri Hatun bt. Abdullah b. Abdurrahman tarafından vech-i âtî üzere vekîl olduğu zâtını ârifân Hüseyin b. Mahmud ve İbrahim b. Ali şehâdetleriyle sâbit olan Mustafa b. Mehmed meclis-i şer‘-i hatîrde Terkos nâhiyesinde Şeyh karyesi kurbünde vâki‘ çiftliği kethüdâsı Mehmed b. Süleyman’dan mezkûr çiftlikde kethüdâlığı esnâsında yedine teslîm olunan altmış guruş kıymetli bir çift manda öküzü ve on kantar saman ve dokuz keyl alaf ve on beş kantar otluk ile yetmiş guruş kıymetli bir çift karasığır öküzü ve iki araba ve bir saban demirini bi’l-vekâle taleb ederim deyü da‘vâ, ol dahi cevâbında eşyâ-yı mezkûreyi ahzını ikrâr ve mârrü’z-zikr manda ve saman ve alaf ve otluğun aynları mevcûd olmağla aynlarını ve yetmiş guruş kıymetli olan öküz ve araba ve saban demirini istihlâk etmekle kıymeti olan yetmiş guruşu edâ ve teslîme râzı olduğu tarafeynin rızâlarıyla tescîl olunup bi’l-iltimâs huzûr-ı âlîlerine i‘lâm olundu. Fî 19 C sene [1]180.