İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 410 Hüküm no: 500 Orijinal metin no: [210-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikilitaş’ta vakıf mahzen kiracısı Mahmud’un, Molla Aşkî Vakfı’ndan menzil ve dükkân kıracıları Feyzullah Afif, Ahmed ve Hayrullah aleyhindeki yol davası Keşf, der-kurb-ı Avratpazarı Ma‘rûz, Sâdır olan fermân-ı âlîlerine imtisâlen savb-ı şer‘-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri ve Haremeynü’ş-şerîfeyn Müfettişi fazîletlü efendi dâ‘îleri tarafından mürsel İbrahim Efendi dâ‘îleri hâssa mi‘mârlarından Mehmed ve Yusuf Halîfeler ile Dârüssa‘âdeti’ş-şerîfe Ağası hazretlerinin nezâret-i aliyyelerinde olan evkāfdan Ayasofya-i kebîr Vakfı’ndan arzuhâlde mezkûr İslambol’da Avratpazarı kurbünde Canbâziye mahâllesinde kâin Dikilitaş ittisâlinde zikri âtî münâza‘un-fîh olan mahâlle varıp huzûr-ı Müslimînde akd-i meclis-i şer‘-i şerîf eylediklerinde ağa-yı müşârün-ileyh hazretlerinin hizmet-i kitâbetleri ile şeref-yâb olan vakf-ı mezbûr mütevellîsi Abdullah Efendi tarafından vekîl-i müseccel-i şer‘îsi Abdullah Ağa b. Ali hâzır olduğu hâlde zikr olunan Dikilitaş derûnunda mahzene beher şehr üç akçe icâre-i müeccele ile ber-mûceb-i temessük mutasarrıfı sâhib-i arzuhâl Mahmud b. Ahmed meclis-i ma‘kūd-ı mezkûrda zikr olunan Dikilitaş’a muttasıl Molla Aşkī Vakfı’ndan olmak üzere kezâlik ber-mûceb-i temessük dekâkîn ve menzile bi’l-icâreteyn mutasarrıfe olan Hadîce Hatun bt. Hüseyin fevt oldukda sadrî kebîr oğulları Feyzullah Afîf Efendi ve Ahmed’e ve sagīr oğlu Hayrullah’a ba‘de’l-intikāl sagīr-i mezbûrun babası ve velîsi Mehri Mehmed Efendi b. Mustafa ile mezbûrân Feyzullah Afif Efendi ve Ahmed taraflarından husûs-ı âti’l-beyanda sâbitü’l-vekâleleri olan Ali Efendi b. Abdurrahman ile zikr olunan Molla Aşkī Vakfı mütevellîsi Mehmed Emin Efendi b. Süleyman ile terâfu‘larında işbu mu‘âyene olunan Dikilitaş’ın iki tarafı Ayasofya-i kebîr Vakfı’ndan değirmen ve bir tarafı ba‘zan yine vakf-ı mezkûrda zevcem Emetullah Hatun tasarrufunda olan menzil ve ba‘zan tarîk-i âm ve bir tarafdan Molla Aşkī Vakfı’ndan dekâkîn ve menzil ile mahdûd Dikilitaş derûnunda kârgîr mahzen taraf-ı vakıfdan bana bâ-temessük icâr ve tefvîz olunup mahzen-i mezkûrun kapısı zikr olunan Molla Aşkī Vakfı’ndan olan menzil tarafında vâki‘ olmağla tarîk-i âmdan zikr olunan mahzen kapısına varınca dükkân ve menzilden tarîk arsasını taleb ederim deyü da‘vâ, mezbûrûn Mehmed Efendi ve Feyzullah Afif Efendi ve Ahmed’in vekîlleri olan mezbûr Ali Efendi ile mütevellî-i mezbûr Mehmed Emin Efendi’den her biri Ayasofya-i kebîr Vakfı’ndan Dikilitaş derûnunda olan mahzen-i mezbûr merkūm Mahmud’un tasarrufunda olduğunu ikrâr, lâkin Molla Aşkī Vakfı’ndan olan dükkân ve menzil derûnundan mahzen-i merkūmun tarîk arsası olduğunu inkâr ve ba‘de’l-mu‘âyene Ayasofya-i kebîr Vakfı’ndan Dikilitaş derûnunda olan mahzen-i mezkûrun kapısı Molla Aşkī Vakfı’ndan olan menzil-i mezkûr tarafında olduğu ba‘de’l-müşâhede zâhir olup mezbûr Mahmud mutasarrıf [211] olduğu mahzen-i mezkûr mahâll-i mezkûreden tarîk-i arsası olduğunu ta‘yîn ve beyana kādir olmamağla mûcebiyle mezbûr Mahmud tarîk arsası mutâlebesiyle vekîl-i mezbûr ile mütevellî-i mezbûre bilâ-beyyine bî-vech mu‘ârazadan ba‘de’l-men‘ mezbûr Mahmud tasarrufunda olan Dikilitaş derûnunda kâin mahzenin Molla Aşkī Vakfı olan menzil tarafında kâin kapısını duvar binâsıyla sed edip ve zevcesi tasarrufunda olan menzil tarafında vâki‘ pencereyi kapı küşâd etmekle bâ-re’y-i mütevellî rızâsıyla mübâşeret etdikde bu minvâl üzere mahzen-i mezkûrun tasarrufuna mümâna‘at etmemeğe vekîl-i mezbûr Ali Efendi ile mütevellî-i mezbûr Mehmed Emin Efendi’den her birine tenbîh eyledikleri mezbûrân dâ‘îleri mahâllinde tahrîr, ba‘dehû meclis-i şer‘e gelip her biri inhâ ve takrîr eyledikleri huzûr-ı âlîlerine i‘lâm olundu. Fî 15 Şevvâl sene 1179.