İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 422 Hüküm no: 513 Orijinal metin no: [217-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Eğinli Mıgırdıç’ın varislerinin, vefat eden Ömer Ağa’nın varisi Mehmed’den miras iddiaları Mîrâs Ma‘rûz, Fi’l-asl Eğin kazâsına tâbi‘ Balçağa nâm karye ahâlîsinden olup mahmiye-i İslambol’da Uzunçarşı’da Astarcılar Hanı’nda mütemekkin iken on dokuz ay mukaddem hâlik olan Mıgırdıç v. Agob v. Abyar zimmînin verâseti hâlâ karye-i mezbûrede zevcesi Turfanda bt. Kirkor ile anası Ebrisima bt. Fehrar ve sagīr oğlu Filiboz ve sagīre kızı Verohima ve kebîre kızı Homar ve mahmiye-i mezbûrede mütemekkin diğer kebîr oğlu Agob ve kebîre kızı Saltana’ya münhasıra ve tashîh-i meselesi yüz altmış sekiz sehmden yirmi bir sehmi zevcesi merkūmeye ve yirmi sekiz sehmi anası mersûmeye ve otuz dörder sehmi oğulları merkūmândan her birine ve on beşer sehmi dahi kızları mersûmândan her birine isâbeti tahakkukundan sonra kendi tarafından asıl ve sagīrân-ı merkūmân taraflarından vasî ve sâir kebîr olan verese-i merkūmân Turfanda ve Ebrisima ve Homar ve Saltana taraflarından husûs-ı âtî’z-zikrde vekîl olduğu şahs-ı merkūmânı ârifân İsmail b. Mehmed ve İbrahim b. Ali şehâdetleriyle sâbit olan sâhib-i arzuhâl merkūm Agob mahmiye-i mezbûrede meclis-i şer‘-i hatîrde yine karye-i mezbûre ahâlîsinden iki sene mukaddem Hacıköyü mütevellîsi iken vefât eden es-Seyyid Ömer Ağa b. Mehmed verese-i münhasırasından sulbî kebîr oğlu olup hâlâ mahmiye-i mezbûrede misâfir ve derûn-ı arzuhâlde ismi mezkûr es-Seyyid Mehmed muvâcehesinde işbu yedimde olup yüz yetmiş altı senesi Şevvâli târîhiyle müverrah ve müteveffâ-yı mezbûr es-Seyyid Ömer Ağa’nın hatt ü hatemini hâvî temessük mantûkunca müteveffâ-yı mezbûr es-Seyyid Ömer Ağa târîh-i mezkûrda han-ı merkūmda mûrisimiz hâlik-i merkūmun odasında malından bin yedi yüz elli altı guruş ikrâz ve kabz ve kable’l-edâ fevt olup tashîh-i mezkûr üzere bize mevrûs olmağla asâleten ve vesâyeten ve vekâleten terekesinden taleb ederim deyü takrîrine mutâbık bir kıt‘a temessük ibrâzıyla ba‘de’d-da‘vâ ve’l-inkâr merkūm Agob müdde‘âsını lede’t-tezkiye adâletleri ihbâr olunan han-ı mezkûrda sâkin ve temessük-i mezkûr hâmişinde isimleri muharrer Şamlı <> el-Hâc Ali b. Hüseyin ve Kahveci diğer el-Hâc Ali b. İbrahim nâm kimesneler şehâdetleriyle isbât edip lâkin mezbûr es-Seyyid Mehmed, babası müteveffâ-yı mezbûr es-Seyyid Ömer’in tereke-i vâfiyesine vaz‘-ı yedini inkâr etmekle müdde‘î-i merkūm müteveffâ-yı mezbûrun tereke-i vâfiyesine vaz‘-ı yedini dahi isbâta havâle olunduğu bi’l-iltimâs huzûr-ı âlîlerine i‘lâm olundu. Fî 28 min-Şevvâl sene 1179.