İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 424 Hüküm no: 516 Orijinal metin no: [217-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Hatun Mektebi Vakfı’ndan Havva, Zeyneb ve Murtaza Ağa’nın kullanmakta oldukları menzilin taksim olunması Keşf, der-kurb-ı Kumkapı dâhili Ma‘rûz, Vârid olan fermân-ı âlîlerine imtisâlen kıbel-i şer‘-i şerîf-i enverden irsâl olunan müderrisîn-i kirâmdan keşif nâibimiz es-Seyyid Halil Efendi dâ‘îleri Hâssa mi‘mârlarından es-Seyyid İbrahim ve Ebubekir Halîfeler ve sâir ümenâ-yı şer‘le mahmiye-i İslambol’da nezâret-i dâ‘îlerinde olan evkāfdan Kumkapı dâhilinde Muhsine Hatun mahâllesinde vâki‘ Sultân Hatun [218] Mekteb-i şerîfi Vakfı’ndan bir tarafı vakf-ı mezbûrdan Emine Hatun ve bir tarafı yine vakf-ı mezbûrdan Mehmed Efendi ve bir tarafdan Fâtıma Hatun menzilleri ve taraf-ı râbi‘i tarîk-i hâs ile mahdûd fevkānî iki bâb oda ve dehliz ve bi’r-i mâ’ ve mahzen ve tahtânî bir oda ve matbâh ve kenîf müştemil menzile varıp huzûr-ı Müslimînde akd-i meclis-i şer‘-i şerîf etdikde menzil-i mezkûrun sekiz sehim i‘tibârıyla bir sehmi Havva Hatun bt. Abdülkadir ve üç sehmi Zeyneb Hatun bt. Abdullah ve dört sehmi Murtaza Ağa üzerlerinde olduğu tahakkukundan sonra mezbûre Havva bir sehim hissesi merkūme Zeyneb’in üç sehim hissesiyle ma‘an taksîm olunmağla râziye ve mütevellî-i vakıf dahi re’y etmekle bu minvâl üzere münâsafeten taksîme mezbûr Murtaza Ağa dahi râzı olduğu ecilden mi‘mârân-ı mezbûrân menzil-i mezkûru misâha ve takvîm eyleyip mezbûre Havva ile mezbûre Zeyneb için Emine Hatun ve Mehmed Efendi taraflarından beş yüz on guruş ve otuz para hisse üzerine kırk zirâ‘ arsa üzerinde mebnâ kırk guruş kıymetli tahtânî bir bâb oda ve matbâh ve kenîf ve binâ tahtında vâki‘ üç yüz kırk sekiz guruş kıymetli terbî‘an yüz yetmiş dört zirâ‘ zemîn ifrâz ve ta‘yîn ve mezbûr Murtaza Ağa’nın dört sehim hissesi için Fâtıma Hatun ve Mehmed Efendi taraflarından beşyüz on guruş ve otuz para hisse üzerine üç yüz yirmi iki buçuk guruş kıymetli fevkānî iki bâb oda ve dehliz ve binâ tahtında vâki‘ ikiyüz yirmi sekiz guruş kıymetli terbî‘an yüz on dört zirâ‘ zemîn ve binâ ittisâlinde vâki‘ ziyâ ahzı için elli sekiz guruş kıymetli tûlen on dört buçuk ve arzen iki ve terbî‘an yirmi dokuz zirâ‘ arsa ve on beş guruş kıymetli su kuyusu ve on guruş kıymetli kapı mahzeni ifrâz ve ta‘yîn eylediklerinde mütevellî-i mezbûr dahi re’y etmekle onlar dahi râzılar olup her biri ahz ve kabûl ve bu minvâl üzere taksîmden mezbûr Murtaza Ağa’nın hissesi takvîmden yüz yirmi iki guruş otuz para iktizâ edip lâkin mezbûr Murtaza Ağa bi-tarîkı’s-sulh rızâsıyla mezbûretân Havva ve Zeyneb’e altmışar guruş verip da‘vâsından zimmetlerini ibrâ etdikde onlar dahi bi-kadri’l-hısasi’l-merkūme meblağ-ı mezkûru ahz u kabz edip hisse-i müfreze-i mezkûrelerine müte‘allıka âmme-i da‘vâdan ahadühüm âharın zimmetini ibrâ ve iskāt ve kat‘-ı nizâ‘ eyledikleri mezbûr dâ‘îleri mahâllinde tahrîr ve gelip ümenâ-yı şer‘le inhâ eylediği bi’l-iltimâs huzûr-ı âlîlerine i‘lâm olundu. Fî 24 min-Şevvâl sene 1179.