İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 442 Hüküm no: 543 Orijinal metin no: [228-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süt, yoğurt ve kaymakçı esnafının nizamı ve İstanbul yoğurtçular esnafının isim listesi Süd, kaymak ve yoğurt narh ve nizâmı Sah, İstanbul kādısı fazîletlü efendi Ber-mûceb-i defter verilen nizâmları fî-mâ-ba‘d düstûrü’l-amel tutulup kârhâne sâhiblerinin isim ve resimleri ve mahâlleri tasrîhiyle sicillâta sebt ve şerh ve hilâf-ı nizâm hareketleri vukū‘ bulmak ihtimâli olur ise te’dîblerini hâvî i‘lâm eyleyesin deyü [buyruldu]. Fi’l-asl İstanbul’da fürûht olunan süd ve kaymak ve yoğurd ber-vech-i âtî meşrûh olduğu vech üzere narh defterlerinde mukayyed iken bu esnâda kaymağı otuz paraya dek bey‘ etmeleriyle iştirâ eden kimesnelerin iştikâlarına binâen kethüdâ ve yiğitbaşı ve esnâfları ihtiyârları meclis-i şer‘e ihzâr olundukda narhın tefâvütü mûcib bir hâl olmadığı beyan olunarak ilzâm ve zeyl-i defterde mastûr kârhâne sâhibleri bi-tav‘ihim narh-ı rûzî-i kadîmi olan hâlis südün kıyyesi üç paraya ve kaymağın kıyyesi on altı paraya ve hâlis Bostan Yoğurdu’nun kıyyesi dört paraya ve hâlis südden Çanak Yoğurdu’nun yüz dirhemi bir çanak olmak üzere bir paraya ve kaymak altı südden yine çanak yoğurdunun yarım kıyyesi bir paraya ve çayır yoğurdunun kıyyesi iki paraya ve torba yoğurdunun kıyyesi beşer paraya olmak üzere kabûl ve ba‘de’l-yevm kârhânelerinde vech-i meşrûh üzere fürûhta ve kârhânelerinde istihdâm etdikleri tablakârlarına dahi fürûht etdirip hilâfı bulunur ise kârhâne sâhibleri muâhaze olunmak ve işbu nizâma muhâlif hareket eder olur ise kendileri ahz ve hükkâma ihbâr etmek üzere ta‘ahhüd etdiklerinden sonra ba‘zıları hufyeten ve ba‘zıları alenen hâlâ kethüdâları pîr ve alîl olmağla vekîli olan oğlu Mehmed ve yiğitbaşıları Hüseyin nâm kimesneler kendi hâllerinde olmayıp esnâfına cevr ü ezâ ve ba‘zı umûrumuza sarf ederim deyü hilâf-ı vâki‘ defa‘âtle akçelerini alıp ve narh-ı rûzînin adem-i icrâsına ve nizâmımızın ihtilâline bâ‘isdir deyü haber vermeleriyle fi’l-hakīka böyle olduğunu ba‘zı sikāt dahi haber verdiklerinden mâ‘adâ cümle kârhâne sâhibleri umûrlarına müdâhaleden merkūmânın memnû‘ olmasını iltimâs ve içlerinden Mustafa b. Ali nâm kimesneyi kethüdâ vekîli ve Halil b. İsmail nâm kimesneyi dahi yiğitbaşı ihtiyâr etmeleriyle işbu nizâmları fî-mâ-ba‘d düstûrü’l-amel tutulmak üzere kârhâne sâhiblerinin mahâlleri tasrîhiyle esâmileri defteridir ki ber-vech-i âtî zikr olunur. Fî 25 B sene [1]179. Alacahamam’da Mustafa Kapalı Fırın’da Halil Gedikpaşa’da İsmail Kaliçacılar’da Hasan Karakö[y] kapısında Mustafa [229] Kumkapı’da Dülbendçi mahâllesinde diğer Hasan Karagümrük’de Hüseyin Def‘a Karagümrük’de Mehmed Şehremini’nde Ahmed Davudpaşa’da Hacı İlyas mahâllesinde Arnavud Hüseyin Fazlıpaşa’da Yusuf Ağakapısı kurbünde Emir İbrahim Çarşambapazarı’nda Ali İsakapısı’nda Dimo Altımermer’de Todori Tekfursarayı’nda Lazar Koska’da Marin Kocamustafapaşa’da Bülbül Aksaray’da Dimo Def‘a Aksaray’da Kirko Kızılmusluk’da Nemko Kıztaşı’nda Kirko Küçükkaraman’da Balto Fenerkapısı’nda Yorgi Ayvansaray’da Marko Çakırçeşmebaşı’nda Niko Celladçeşmesi’nde Kota Haksöy’de Hasan Beyoğlu’nda İbrahim Hasköy’de Yanaki Nerdübanlı Câmi‘inde Niço Hocapaşa’da Yanaki Eyüb’de Ahmed Ağa kârhânesinde Desbot Hacı İsmail Kârhânesinde İstepot Yine Hacı İsmail Kârhânesinde Hıristo Ahmed Ağa Kârhânesinde İlko Kal‘a halîfesi Kârhânesinde Marko Çömlekçilerde Bekir Ağa Kârhânesinde Diğer Marko Kasımpaşa’da Ahmed Beyoğlu’nda Tepebaşı’nda diğer Ahmed