İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 222 Hüküm no: 180 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu tayin olunan Ebûbekir, Ahmed, İsmail, Mahmud ve Mustafa’nın kasaplar esnafından ihracı gereken iki hayme için altmış bin akçe tahsil ettikleri İşbu sâl-i meymenet-iştimâlde vâki‘ sefer-i hümâyûn-ı nusret-makrûn için İslambol esnâfının mükemmel ve müretteb ordu ihrâcı bâbında ordu-yı hümâyûn ağası ta‘yîn buyrulan Dergâh-ı âlî kapıcıları zâbitânından İsmail Ağa b. Yusuf yediyle fermân-ı âlî sâdır olmağın imtisâlen-leh mahmiye-i mezbûrede vâki‘ kassâbân esnâfı üzerlerine ihrâcı lâzım olan iki hayme ile ordu ihrâcı’çün taraflarından orducu nasb ü ta‘yîn eyledikleri Ebûbekir Beşe b. Ali ve Ahmed Beşe b. Osman ve İsmail b. Mehmed ve Mahmud b. Mehmed ve Mustafa b. İsmail nâm kimesneler ordu-yı hümâyûn ihrâcı’çün kıbel-i şer‘den irsâl olunan Ali Efendi’[nin] Mahmud Paşa Câmi‘-i şerîfi türbe kapısı hâricinde akdeylediği meclis-i şer‘-i şerîf-i enverde esnâf-ı mezbûre kethudâsı İsmail Ağa b. Ali ve el-Hâc Mehmed Ağa b. el-Hâc İsmail ve sâbıkā sığır kasabları kethudâsı es-Seyyid İsmail Ağa b. Ahmed ve Ebûbekir Efendi b. Mustafa ve el-Hâc Mehmed b. Mustafa ve diğer el-Hâc Mehmed b. el-Hâc Halil ve yiğitbaşı el-Hâc Abdullah b. Ahmed ve Çarıkcılar Kethudâsı el-Hâc Mustafa ve mumcubaşı Mehmed b. Ömer ve âhar Yiğitbaşı Derviş Mehmed b. Ali ve Mehmed Said ve sâirleri mahzarlarında ikrâr-ı tâm ve takrîr-i kelâm edip ber-mûceb-i emr-i âlî ve defter-i mevkūfât-ı hakānî esnâf-ı mezbûre üzerlerine sene-i mübârekede ihrâcı lâzım olan iki hayme ile ordu ihrâcı’çün taraflarından bizi orducu nasb ü ta‘yîn eylediklerinde bizler dahi ber-minvâl-i muharrer orduculuğu kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğimizden sonra mu‘tâd-ı kadîm üzere beher hayme için veregeldikleri otuzar bin akçeden iki hayme için cem‘an altmış bin akçeyi kethudâ ve yiğitbaşıları ve sâirleri yedlerinden tamamen ve kâmilen ahz u kabz eyledik fîmâ-ba‘d meblağ-ı mecmû‘-ı mezkûrdan merkūmûn yedlerinde bir akçe ve bir habbe bâkī kalmamışdır dediklerinde kethudâ-yı mezbûr ve bâlâda isimleri mastûr esnâf-ı mezbûre ihtiyârları merkūmûn dahi mukırr-ı mezbûrûnu tasdîk ve tahkīk ve mezbûrların hizmet-i mezkûru kemâ-yenbagī idâre ve rü’yetlerine ta‘ahhüd ve tekeffül eylediklerini kâtib-i mezbûr mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu Fî 11 Zilka‘de sene 1184 Şuhûdu’l-hâl: Şâhidûnü’s-sâbıkūn.