İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 50 Hüküm no: 5 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey b. İbrahim’in Çadırcı Ahmed Mahallesi’ndeki menzilini Eskisaray Teberdarlar Kethudası Süleyman Ağa’ya üç bin guruşa sattığı Mübâya‘a-i menzil 3000 Mahmiye-i İslâmbol’da Kadırga Limanı kurbünde Çadırcı Ahmed Mahallesi sâkinlerinden İbrahim Bey b. İbrahim nâm kimesne meclis-i şer‘-i hatîr-i lâzımü’t-tevkīrde hâlâ Saray-ı atîk teberdârlar kethudâsı olan mefharu’l-emâsil ve’l-akrân bâ‘is-i hâzihi’l-vesîka es-Seyyid el-Hâc Süleyman Ağa b. el-Hâc Ali tarafından husûs-ı âti’l-beyânda ber-vech-i câ’î tasdîka ve def‘-i semen ve ibrâya vekîl olduğu Teberdâr Ali Ağa b. İsmail ve Teberdâr Hasan Ağa b. Mehmed nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık olan Saray-ı atîk Kâtibi İsmail Efendi b. Ali mahzarında ikrâr-ı tâm ve takrîr-i kelâm edip arsası Behram Çavuş Vakfı’na senede bin yüz altmış akçe ve Ali Efendi Vakfı’na yedi-yüz yirmi akçe mukāta‘a-i kadîme ile taht-ı tasarrufumda ve üzerinde kâin bi’l-cümle ebniyesi iki kıt‘a hüccet-i şer‘iyye mantûklarınca akd-i âti’z-zikrin sudûruna dek yedimde mülküm olup zikrolunan Çadırcı Ahmed Mahallesi’nde vâki‘ bir tarafdan ba‘zan el-Hâc Ömer menzili ve ba‘zan mîrî bostan ve bir tarafdan Behram Çavuş Câmi‘-i şerîfi ve ba‘zan Ahmed Bey menzili ve bir tarafdan imâma meşrûta sagīr menzil ve bir tarafdan tarîk-i hâs ile mahdûd hâriciyede fevkānî üç bâb oda ve bir sofa ve dîvânhâne ve tahte’s-semâ ve ahur ve havlu ve mârrü’z-zikr mîrî bostanına açılur bir kapu ve dâhiliyede fevkānî ve tahtânî dört bâb oda ve tahta-pûş ve kiler ve bir kârgir hamam ve matbah ve câmekân ve eşcâr-ı müsmire ve gayrı müsmireli bağçe ve derûn-ı bağçede bir bi’r-i mâ’ ve bir ekmek fırını ve etrâf-ı erba‘adan taş dîvâr ve müştemilât-ı sâire-i ma‘lûmeyi hâvî bir bâb menzilin ebniye-i memlûke-i mezkûresini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile üç bin guruşa müvekkil-i mûmâ-ileyh es-Seyyid el-Hâc Süleyman Ağa’ya bey‘ ve temlîk ve arsa-i merkūmesini dahi mütevellîleri ma‘rifetleriyle tefvîz ve teslîm eylediğimde, ol dahi ber-vech-i muharrer iştirâ ve temellük ve tefevvüz ve tesellüm ve kabûl eyledikden sonra semeni olan meblağ-ı mezbûr üç bin guruşu vekîl-i mezbûr İsmail Efendi müvekkil-i mûmâ-ileyhin mâlından olmak üzere işbu meclis-i şer‘de bana def‘ ü teslîm eylediğinde, ben-dahi yedinden tamamen tesellüm ve ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini [2a] bi’l-asâle ve bi’l-vekâle ibrâ-i âm ile ibrâ ve ıskāt edip ve herbirimiz âharın ibrâsını kabûl eyledik. Ba‘de’l-yevm benim asla alâka ve medhalim kalmayup menzil-i mahdûd-ı mezkûrun ebniye-i memlûke-i mezkûresi müşteri-i müvekkil-i mûmâ-ileyh es-Seyyid el-Hâc Süleyman Ağa’nın mülk-i müşterâsı ve arsa-i merkūmesi dâhil-i havza-i tasarrufu olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Rebî‘ülevvel sene 1193. Şuhûdü’l-hâl: İmâm-ı mahalle Hâfız Hüseyin Efendi b. Hasan, el-Hâc Ahmed b. Ahmed Müezzin-i mahalle-i merkūm, Feyzullah b. Mehmed, Kayyım es-Seyyid el-Hâc Ahmed b. Osman, Mehmed Emin b. Hüseyin.