İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 121 Hüküm no: 86 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Çelebi b. İbrahim ile Oskehan v. Markos’un Okçularbaşı’ndaki ekmekçi fırını gediğini Mehmed Efendi b. Ali’ye iki bin iki yüz elli guruşa sattıkları Mahmiye-i İstanbul’da İbn Meddas Mahallesi’nde sâkin es-Seyyid İsmail Çelebi b. es-Seyyid el-Hâc İbrahim nâm kimesne ile Oskehan v. Markos nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Rûznâmçe-i evvel hulefâsından üçüncü halîfe es-Seyyid el-Hâc Mehmed Efendi b. el-Hâc Ali nâm kimesne mahzarında her biri ikrâr-ı tâm ve takrîr-i kelâm edip akd-i âti’z-zikrin sudûruna dek ale’l-iştirâki’s-seviy yedimizde mülkümüz olup mahmiye-i merkūmede Okçularbaşı’nda vâki‘ Çakılcı demekle ma‘rûf bir bâb ekmekçi fırını derûnunda mevcûde beyne’l-hiref gedik ta‘bîr olunur âlât-ı lâzımemizi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm es-Seyyid el-Hâc Mehmed Efendi’ye iki bin iki yüz elli guruşa bey‘ ve temlîk ve teslîm eylediğimizde, ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr iki bin iki yüz elli guruşu bize def‘ ü teslîm eylediğinde, biz dahi yedinden tamamen ve kâmilen tesellüm ve ahz ü kabz edip mebî‘-i mezkûrun tağrîr ve gabnine ve istifâ-i semene ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsemâtdan müşteri-i mezbûr es-Seyyid el-Hâc Mehmed Efendi’nin zimmetini ibrâ-i âm ile ibrâ ve ıskāt eylediğimizde, ol dahi ibrâ-i mezkûru kabûl eyledi. Ba‘de’l-yevm zikrolunan âlât-ı lâzımede bizim asla ve kat‘â alâka ve medhalimiz kalmayup müşteri-i mezbûr es-Seyyid el-Hâc Mehmed Efendi’nin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 25 min-Zilhicce sene 1193. Şuhûdü’l-hâl: Uncular Kethudâsı Mustafa, Kanlıfırınlı el-Hâc Ahmed Ağa, es-Seyyid Mehmed Said Ağa, Fındıklılı Mehmed Ağa, Sayıcı Molla Osman, Bedirzâde Molla Ali.