İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 541 Hüküm no: 634 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mora’lı Hasan b. Ahmed’in, Selanikli Mustafa b. Osman’daki alacağını kefilliğinden dolayı Selanikli Murad b. Abdurrahman’dan talep etmesi Mazbatadan derkenâr Ma‘rûz Derûn-ı arzuhâlde mezkûrü’l-ism Moravî Hasan b. Ahmed nâm kimesne meclis-i şer‘-i münîrde sâhib-i arzuhâl Selanikli Murad b. Abdurrahman muvâcehesinde bin iki yüz on beş senesi Cumâdelâhırenin yirmi ikinci günü târihiyle muvarrah ve ol târihde şer‘iyyâtı bulunan Ömer Efendi’nin hatmiyle mahtûm bir kıt‘a i‘lâm-ı şer‘î mantûkunca benim gāib ani’l-meclis Selanikli Mustafa b. Osman nâm kimesne zimmetinde cihet-i deyn-i şer‘îden altı yüz elli guruş mahkûmun-bih alacak hakkım olup deyn-i mezkûru için gāib-i mezbûr Ağakapısında mahbûs iken merkūm Murad ile refîki gāib ani’l-meclis Osman nâm kimesneler meblağ-ı mezbûru bizden bil, doksan bir gün mürûrunda biz verelim deyip ondan gayrı nesne söylemeyip ol vechile meblağ-ı merkūma kefîl olmuş olmalarıyla binâen aleyh meblağ-ı merkūmun nısfı olan üç yüz yirmi beş guruşu merkūm Murad’dan hâlâ taleb ederim deyü takrîr-i meşrûhu üzere mücerred bizden bil, biz verelim demek zamân ve iltizâmı muntazam-ı elfâz-ı kefâletden olmamağla meblağ-ı merkūmu mütâlebeye kādir olmadığı kendiye tefhîm ve ilzâm için fetvâ-yı şerîfe havâle olunup biz dahi zuhûr etmemeleriyle henüz da‘vâlarına faysal verilmediği bir hafta mukaddem târihiyle cerîdemizde mastûr ve mukayyed bulunmağın imtisâlen li’l-emri’l-‘ali zabtı İstanbul Mahkemesi’nden huzûr-ı âlîlerine i‘lâm olundu. Fî-gurre-i min-Zilhicce sene [1]217