İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 187 Hüküm no: 148 Orijinal metin no: [19a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağlar Fırını ustaları Arnavut Maksud ve Yaşar b. Tahir’in kapalı bulunan Dedeler fırını tablakârlarından birinin kendi fırınlarında istihdam olunmasına dair talepleri Ekmekçilerin fermân istid‘âsı Ma‘rûz Mahrûse-i Galata’ya muzâfe kasaba-i Kasımpaşa’da Debbâğlar Fırını ta‘bîr olunur ekmekçi fırınının ustaları Arnavud Maksud ve şerîki Yaşar b. Tâhir meclis-i şer‘-i münîrde yine kasaba-i mezbûrede Cumapazarı Fırını ustaları İsmail Ağa ve şerîki İbrahim Ağa ile habbâzân kethudâsı İbrahim Ağa ve yiğitbaşıları Süleyman ve Uncular Kethudâsı es-Seyyid Mustafa Ağa ve sâir bi’l-cümle nizâm ustaları muvâcehelerinde kasaba-i merkūmede Dedeler Fırını demekle ma‘rûf mesdûd fırının tablakârlarından bir aded tablası Cumapazarı Fırını’na ta‘yîn olunmuş olmağla ref‘ olunup kendi fırınımıza ta‘yîn olunması matlûbumuzdur dediklerinde mezbûrûndan suâl olundukda fi’l-hakīka zikr olunan Dedeler Fırını mesdûd olup bir aded tablasını Cumapazarı Fırını selâtîn fırını olmağla kapanmadan muhâfaza zımnında bi’l-cümle ustalar ma‘rifetiyle ta‘yîn olunmuş olup ref‘ olunmak lâzım gelir ise ihtilâl-i nizâmımızı mûcib olduğundan mâ‘adâ fırın-ı mezkûrun kapanmasına bâ‘is olacağı bir keyfiyet olmağla tabla-i mezkûrenin merbût olduğu Dedeler Fırını küşâd oluncaya kadar taraf-ı âhardan müdâhale olunmayıp Cumapazarı fırınında istihdâm olunması matlûbumuzdur deyü kethudâ ve bi’l-cümle nizâm ustaları istid‘â ve istirhâm eylediklerinde mezbûrân Maksud ve Yaşar ve dahi mücâb olup ol-vechile kat‘-ı nizâ‘ etmeleriyle esnâf-ı merkūmenin nizâmlarını ihtilâlden vikāye zımnında fermân-ı âlîleri sudûru iktizâ eylediği İstanbul Mahkemesi’nden huzûr-ı [âlîlerine i‘lâm olundu]. Fî 3 Zilhicce sene 1222.