İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 323 Hüküm no: 298 Orijinal metin no: [40a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenci Maverdi’nin kölelikten azat edilmesi ve çocuğunun babasının, sahibi olan Şemseddin b. Abdullah olduğunun tescil olunması Sübût-ı neseb Ma‘rûz Rıkka inkıyâd-ı sâbıkını mukırra ve mu‘terife olup ber-vech-i âtî da‘vâya kıbel-i şer‘den me’zûne olan ma‘lûmetü’l-evsâf sâhibe-i arzuhâl Zenciye Maverdi bt. Abdullah Efendi meclis-i şer‘-i münîrde mevlâsı derûn-ı arzuhâlde mezkûrü’l-ism Şemseddin b. Abdi nâm kimesne muvâcehesinde ben bundan akdem mezbûr Şemseddin’in yedinde câriye-i memlûkesi olduğum halde beni vaty ve ol-vechile firâşından hâsıl işbu yedimde olan veled-i sagīr tevellüd ve ismi Bilal tesmiye olunmağla mezbûr Şemseddin veled-i mezkûr bendendir deyü da‘vet dahi eylediğinden mâ‘adâ beni mahzar-ı şühûdda malından âzâd ve i‘tâk ve harâir-i asliyât zümresine idrâc ve ilhâk edip üzerimde hakk-ı velâdan gayrı hakkı kalmamağla sebîlim tahliye olunması murâdımdır deyü da‘vâ etdikde, ol dahi cevâbında kaziyye minvâl-i meşrûh üzere olduğunu bi-tamamihi tâyi‘an ve kat‘iyyen ikrâr ü i‘tirâf etmeğin mûcebince müdde‘iye-i mezbûre’nin sebîli tahliye olunup veled-i mezkûrun nesebi merkūm Şemseddin’den şer‘an sâbit olduğu İstanbul Mahkemesi’nden huzûr-ı [âlîlerine i‘lâm olundu.] Fî 25 Ra sene 1223.