İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 75 Hüküm no: 16 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Yeni Han’da yerleşik Dimitri v. İsparci’ye verilen Avrupa tüccarı beratının İstanbul Bab Mahkemesi’ne kaydedilmesi Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki El-hâletü-hâzihî berren ve bahren Avrupa ticâretiyle me’lûf olanlar ve bundan böyle izhâr-ı hâhiş ve arzu eden Devlet-i Aliyye’nin ehl-i zimmet re‘âyâsının ticâretlerinin taht-ı râbıta ve nizâma idhâlleri husûsuna irâde-i kerâmet-ifâde-i mülûkânem ta‘alluk eylediği cihetden müste’men tercümanları ve hizmetkârlarının nâil oldukları imtiyâzât ve emniyet ve müsâ‘ade ve ri‘âyet tamamen bunların haklarında bilâ-istisnâ icrâ kılınması rüsûm-ı ra‘iyyet-perve[r]îden olduğu ecilden o makūle Avrupa tâcirler[in]e ve hizmetkârlarına derecelerine [5a] nazaran şurût-ı lâzıme derci ve elkābları beyânıyla yedlerine başka başka berevât ve evâmir i‘tâ olunması husûsu bâ-hatt-ı hümâyûn verilen şurût-ı nizâmdan olduğuna ibtinâen Der-aliyye’mde Yeni Han’da mukīm Dimitri v. İsparci yedine şurût-ı nizâm üzere mufassal ve meşrûh ticâret beratı i‘tâ olunduğu beyânıyla ber-mûceb-i şurût-ı nizâm yedine verilen berat-ı şerîfim İstanbul Bâb Mahkemesi’ne kayd ve mûceb ü muktezâsıyla amel ve hareket ve himâyet ü sıyânet olunmak bâbında emr-i şerîfim sudûrunu tüccâr nâzırları istid‘â eylediklerin hademe-i Devlet-i aliyyemden olup tüccâr-ı merkūme üzerlerine nâzır nasb u ta‘yîn olunan hâcegân-ı Dîvân-ı mu‘allâ-erkânımdan kıdvetü’l-emâcid ve’l-ekârim Seyyid Abdurrahim Muhib -zîde mecduhû- bir kıt‘a memhûr takrîriyle ifâde etmekle vech-i meşrûh üzere amel olunmak fermânım olmağın imdi ber-minvâl-i muharrer mersûm Avrupa tüccârından olmak üzere ber-mûceb-i şurût-ı nizâm yedine verilen berat-ı âlî-şânımı İstanbul Bâb Mahkemesi’ne sebt ü kayd birle yedinde ibkā ve mûceb ü muktezâsı üzere amel ve hareket ve himâyet ü sıyânet olunmak ve mugāyir-i şurût-ı <> berat hâlât tecvîz olunmamak bâbında fermân-ı âlî-şânım sâdır olmuşdur. Buyurdum ki: Hükm-i şerîfim vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından be-gāyet hazer ve mücânebet eyleyesiz. Şöyle bilesiz alâmet-i şerîfe i‘timâd kılasız. Tahrîren li’l-evâili şehri Cumâdelûlâ sene [1]217 El-mahrûse-i Kostantıniyye