İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 257 Hüküm no: 158 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Resm-i Kantar Mukataası’nın 7,5 adet 1/8 hissesinin 1221 senesi iltizamının belirtilen şartlar çerçevesinde Mehmed Reşid’e verildiği İstanbul Kantarı rüsûm fermânı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Hâlâ Îrâd-ı Cedîd-i hümâyûnum Hazînesi Defterdârı iftihârü’l-emâcid ve’l-ekârim es-Seyyid Feyzullah -dâme mecduhû-nun [64a] Dersa‘âdet’ime takdîm eylediği memhûr temessüğü mefhûmunda mukāta‘at-ı mîrîyyeden rub‘ hissesi Îrâd-ı Cedîd’de ve beş buçuk sümün hissesi mevâlî-i izâmdan İbrahim uhdesinde ve nısf sümün hissesi Hâcegân-ı Dîvân-ı Hümâyûn’umdan Ahmed Azmi -dâme mecduhû- uhdesinde olan Resm-i Kantar-ı İstanbul ve Tevâbi‘i Mukāta‘ası’nın mukaddemâ Îrâd-ı Cedîd’e zabtolunmuş olan rub‘ hisse-i mezkûresi iki yüz yirmi bir senesine mahsûben müşteriki mûmâ-ileyh İbrahim’e der-uhde ve iltizâm olunmuş olup ancak mûmâ-ileyh fevt olmağla mutasarrıf olduğu beş buçuk sümün hissesi dahi ber-mûceb-i Nizâm-ı Cedîd, Hazîne-i merkūm tarafından zabt ve mukaddemâ kendine der-uhde olunan rub‘ hisse-i mezkûrenin iltizâmı tabî‘atıyla fesholunup Mukāta‘a-i mezbûr sene-i merkūma mahsûben yed-i vâhidden Îrâd-ı Cedîd-i hümâyûnum Hazînesi tarafından der-uhde ve iltizâm olunmak lâzım gelmekden nâşî Mukāta‘a-i mezbûreyi bin iki yüz yirmi bir senesi Muharrem’i gurresinden sene-i merkūme Zilhiccesi gāyetine değin bir sene-i kâmile yed-i vâhidden zabt ve rabteylemek üzere der-uhde ve iltizâmına tâlib ve râgıb olan kıdvetü’l-emâsil ve’l-akrân Mehmed Reşid -zîde kadrühû-ya yedi buçuk sümün hisse-i mezkûre gayr-ı ez-mâl ve kalemiye ve harc-ı aklâm yalnız otuz beş bin yüz altmış bir guruş fâiz ile der-uhde ve iltizâm olunup ol dahi iltizâm ve kabûl birle bedel-i iltizâmı olan meblağ-ı mezbûru vakt ü zamanıyla edâ ve teslîm eylemek üzere Îrâd-ı Cedîd-i hümâyûnum Hazînesi’ne memhûr deyn temessüğü vermeğin ber-vech-i muharrer Mukāta‘a-i mezbûreyi sene-i merkūmeye mahsûben yed-i vâhidden zabt u rabt ve vâki‘ olan mahsûlât ve rüsûmâtın kānûn-ı kadîm ve olageldiği üzere ahz ü kabz eyleyip taraf-ı âhardan müdâhale olunmamak üzere Mukāta‘a-i mezbûrenin rub‘ hissesi için mukaddem verilen emr-i şerîfin kaydı terkīn olunarak Mukāta‘a-i mezbûreyi sene-i mezbûreye mahsûben yed-i vâhidden zabtı için müceddeden emr-i şerîfim i‘tâsını iltimâs etmekle mukaddem verilen emrin kaydı ref‘ ü terkīn olunmağla imdi vech-i meşrûh üzere amel olunmak fermânım olmuşdur. Buyurdum ki: Hükm-i şerîfim vardıkda bu bâbda sâdır olan emrim üzere amel olunmak dahi ber-vech-i muharrer mukāta‘a-i mezbûrenin rub‘ hissesi için mukaddem verilen emrin kaydı Hazîne-i âmirem defterlerinden ref‘ ü terkīn olunmağla sen ki mevlânâ-yı mûmâ-ileyhsin, mûmâ-ileyhin yedine i‘tâ olunan fermân-ı âlî-şânım mûcebince mukāta‘a-i mezbûreyi sene-i merkūmeye mahsûben yed-i vâhidden zabt u rabt ve vâki‘ olan rüsûmât ve âidâtın kānûn-ı kadîm [ve] olageldiği üzere ahz ü kabz ve cem‘ ü tahsîl ettirtip mugāyir-i emr-i âlî-şânım âharı bir türlü müdâhale ve ta‘arruz ettirmeyesin. Şöyle bilesin alâmet-i şerîfe i‘timâd kılasın. Fî 20 min-Rebî‘ülûlâ sene [1]221 Kostantıniyyeti’l-mahrûse