İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 286 Hüküm no: 182 Orijinal metin no: [73a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arpa ve buğday yüklü gemilere yağ yüklenmemesinin tembihi Kapan tüccâr ve rüesâlarına dâir yağ men‘i. Bâ-sah. İstanbul Kādısı Fazîletlü Efendi ( ) ve Gümrük Emîni Ağa Tomarabad ve İsmail ve Kili ve İbrail ve Kalas ve sâir ol havâlî iskelelerinden hınta ve şa‘îr tahmîl olunan Kapan sefâinine sekizer onar yedek ve dahi ziyâde envâ‘-ı revgan tahmîl ile sırren ba‘zı mahallere ihrâc ve füruht etmekde oldukları bu def‘a ihbâr ve tahkīk olunup ecnâs-i revganın doğru Der-aliyye’ye gelip don ve çerviş yağları kapanlara ihrâc ve revgan-ı sâde dahi Der-aliyye’de füruht olunmak lâzımeden iken ba‘zı muhtekir tâifesinin bu misillü kâr-ı memnû‘a ictisârları kendilerinin icrâ-yı tedîblerini îcâb etmekden nâşî fîmâ-ba‘d bu maddeye dikkat olunarak o makūle hınta ve şa‘îr mahmûl Kapan sefâininde revgan bulundukda derhâl yağları cânib-i mîrî için zabtolunacağından başka cesâret eden rüesâ-yı sefâin ve tüccârın dahi tedîbât-ı şedîdeleri icrâsı [73b] musammem ve mukarrer olduğundan ol bâbda tenbîh ve te’kîdi hâvî mârrü’z-zikr iskelelere evâmir-i aliyye irsâl olunmuş olmağla imdi siz dahi keyfiyeti bi’l-cümle tüccâra etrâfıyla ifâde birle ba‘d-ezîn hınta ve şa‘îr mahmûl sefâine envâ‘-ı revgandan bir yedek revgan tahmîl ettirilmemesini gereği gibi tenbîh ve te’kîde mübâderet ve sûret-i nizâmını huzûrumuza [i‘lâma] müsâra‘at eyleyesiz deyü buyruldu. Fî 28 Ra sene [1]221