İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 302 Hüküm no: 198 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Kadısı’nın kömürcü esnafına, şimdiden çokça kömür getirterek kışın halka kömür sıkıntısı çektirmemeleri hususunda tembihte bulunup taahhüt alması Kömürcüler[e] dâir. Bâ-sahh-ı âlî. İstanbul Kādısı Fazîletlü Efendi El-hâletü-hâzihî mevsim-i şitâ ân be-ân takarrub etmekde olup muhtekir tâifesinin mecbûl oldukları tama‘ ve habâset cihetiyle şitâda, kömür yokdur, diyerek gālî bahâ ile füruhta ikdâm ve cesâret edecekleri zâhir ve ibâdullâhı bu bâbda muzâyaka ve hasârdan vikāye için kömür maddesine şimdiden bir râbıta verilmesi muktezâ-yı vakt ve maslahatdan idiği nümâyân ve bâhir olmağla imdi kömürcüler kethudâsını ve esnâfından sâir muktezî olanlar[ı] celb ve ihzâr birle bundan sonra mevsim-i sayfa kadar mağazalarında kesret üzere kömür bulunmayıp ibâdullâha gālî bahâ ile füruht etmeğe cesâretleri lâzım gelir ise günâhı boyunlarına olsun eşedd-i ukūbetle tedîb olunacakları musammem ve mukadder idiğini [78b] cümlesinin gûş-ı hûşlarına etrâfıyla ifâde ve tenbîh ederek şimdiden her biri külliyetlü kömür celb ve istihzâr ile mevsim-i şitâda ibâdullâha zarûret çektirilmemesi esbâbını istihsâle dâmen der-miyân gayret eylemelerini gereği gibi tenbîh ve te’kîde müsâra‘at ve sûret-i nizâm ve ta‘ahhüdlerini huzûrumuza [i‘lâma] mübâderet eyleyesiz deyü. Fî 27 B sene 1221