İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 306 Hüküm no: 203 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul bakırcı esnafının kırkma ve talaş bakırlarının eritilip külçe haline getirilmesi için belirtilen yerdeki dükkânın kalhaneye çevrilmesine izin verildiği. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ bi’l-fi‘il İstanbul Kādısı -zîdet fezâilühû- ve iftihârü’l-ümerâi ve’l-ekâbir, müstecmi‘u cemî‘i’l-ma‘âlî ve’l-mefâhir, el-muhtassu bi-mezîd-i inâyeti’l-Meliki’l-kādir bi’l-fi‘il Dergâh-ı mu‘allâm Yeniçerileri Ağası olan Osman Ağa -dâme ulüvvuhû- ve kıdvetü’l-emâcid ve’l-a‘yân Hâssa Mi‘mârbaşısı olan İbrahim Kâmî -zîde mecduhû- tevkī‘-i refî‘-i hümâyûn vâsıl olucak ma‘lûm ola ki Bakırcı esnâfının mübârek Rikâb-ı kamer-tâb-ı hüsrevâneme sundukları bir kıt‘a arzuhâllerinde bunlar kazgancı ta‘bîr olunur evânî-i nuhâsiye tasnî‘ ve i‘mâliyle me’lûf olup kadîmden beri tasnî‘ ve i‘mâl eyledikleri evânî-i nuhâsiyeden hâsıl olup dükkânlarında müctemi‘ olan talaş ve kırkma makūlesi nuhâsı tekrar k[a]l edip hâs nuhâs olarak külçe yapmak için bir neferden mâ‘adâ kalcıları olmadığından zikrolunan kırkma ve talaş makūlesi nuhâsın cümlesini kala adem-i idâresinden nâşî dükkânlarında talaş ve kırkma makūlesi nuhâs müctemi‘ olarak envâ‘-ı meşakkate dûçâr ve umûrları ukde-i ta‘tîle giriftâr olduğun inhâ ve Ayazmakapısı dâhilinde kâin bir aded mağazanın kalhâne olması husûsuna ruhsat-ı seniyyem erzânî kılınmasını istid‘â ve husûs-ı mezbûr sen ki Yeniçeri Ağası mûmâ-ileyhsin, seninle Mi‘mârbaşı mûmâ-ileyhe lede’l-havâle mahâll-i merkūmda inşâsı istid‘â olunan kalhânenin mahâllini mu‘âyene için Mi‘mârbaşı mûmâ-ileyh ile bi’l-ma‘iyye varıp müşâhede eylediğin mahâll-i mezkûrun etrâfı kârgir duvarlı ve üzeri dahi kezâlik kârgir toloslu ve ittisâlleri kârgir ve karşısı ahşab kazgancı dükkânları olup zikrolunan kârgir dükkân derûnuna kalhâne için yine kârgir [79b] olarak bir aded ocak inşâsıyla kalhâne resmine ifrâğında etrâf ve civârına bir gûne mazarrâtı olmadığından mâ‘adâ sâir emsâli dahi olduğu ve mahâll-i mezbûrun Mi‘mârbaşı-i mûmâ-ileyh ma‘rifetiyle bir kıt‘a resmi ihrâc ve takdîm olunmuş idiği beyânıyla kalhâne-i mezkûrun inşâsına ruhsatı hâvî emr-i şerîfim sudûrunu i‘lâm etmenle i‘lâmın mûcebince amel ve hareket olunmak fermânım olmağın imdi zikrolunan kârgir dükkânın derûnuna inşâ olunacak kalhâne ocağı kârgir olmak ve civârlarına bir gûne mazarrâtı olmamak üzere dükkân-ı mezkûrun kalhâne resmine ifrâğı husûsuna izin ve ruhsat-ı şâhânem erzânî kılındığı siz ki Mevlânâ ve Yeniçeri Ağası ve Mi‘mârbaşı-i mûmâ-ileyhimsiz, ma‘lûmunuz oldukda ber-vech-i meşrûh amel ve hareket olunmak ve hilâfı vaz‘ ve hâlât tecvîz olunmamak bâbında fermân-ı âlî-şânım sâdır olmuşdur. Buyurdum ki: Vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından be-gāyet hazer ve mücânebet eyleyesiz. Şöyle bilesiz alâmet-i şerîfe i‘timâd kılasız. Tahrîren fî-evâsıtı Recebi’l-ferd sene ihdâ ve işrîn ve mieteyn ve elf. Be-makām-ı Kostantıniyyeti’l-mahrûse