İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 461 Hüküm no: 342 Orijinal metin no: [124b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osmanlı ordusu için 42 adet Sirem arabası hazırlanması Ordu-yı hümâyûna Sirem arabası tertîbi fermânı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Sen ki mevlânâ-yı mûmâ-ileyhsin, el-hâletü hâzihî Moskov keferesi üzerine sefer-i hümâyûn-ı nusret-makrûnum tahakkukuna binâen müsta‘înen billâhi te‘âlâ Der-aliyye’mden ihrâcı musammem olan ordu-yı hümâyûnumda mevcûd olunup hidemât-ı lâzımede istihdâm olunmak için sâbıkı mûcebince müstevfî Sirem arabasının tertîbi lâzım geldiğine binâen Başmuhâsebe’den ihrâc ve derûn-ı emr-i şerîfime mevzû‘an irsâl olunan sûret-i defter mûcebince Âsitâne-i aliyyemden tertîb olunan kırk iki kıt‘a Sirem arabaları sâbıkı mûcebince yola girdikleri günden i‘tibâren ber-vech-i mu‘tâd îcâb eden ücretleri Ordu-yı hümâyûnum arabacıbaşısı yedinden verilmek şartıyla zikrolunan arabaları şimdiden tedârük ve bi-mennihî te‘âlâ işbu sene-i mübâreke Cumâdelevvel gurresinden evvelce Davutpaşa Sahrâsı’nda hazır bulunmasına irâde-i aliyyem ta‘alluk etmekle mûcebince amel ve hareket eylemeniz fermânım olmağın işbu emr-i âlî-şânım ısdâr ve ( ) ile irsâl olunmuşdur. İmdi bâlâda bast u beyân ve sûret-i defterde tasrîh u ayân kılındığı vechile kırk iki kıt‘a Sirem arabasının bargirleri güçlü ve kuvvetlü olarak tedârük ve gurre-i mâh-ı mezbûrdan mukaddemce Davutpaşa Sahrâsı’nda mevcûd bulunmasına ihtimâm ve dikkat eylemen bâbında fermân-ı âlî-şânım sâdır olmuşdur. Buyurdum ki: Hükm-i şerîfimle ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı münîfi üzere âmil olasın. Şöyle bilesin alâmet-i şerîfe i‘timâd kılasın. Tahrîren fi’l-yevmi’l-hâmis-aşer [min]-Rebî‘i’l-âhir sene erba‘a [ve] işrîn ve mieteyn ve elf. Kostantıniyye-i mahrûse