İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 273 Hüküm no: 250 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ömer Efendi ile Seyyid Mehmed Reşid’in, Molla Ömer ile müteveffâ Hasan Ağa’nın vârisleri aleyhine açtıkları davalarını ispat edemediklerinden muarazadan men edildikleri Kasımpaşa’da şîruganhânenin mu‘ârazası tekrar men‘i Mukābele şüd Ma‘rûz[-ı dâ‘î-i devlet-i aliyyeleridir ki] Sâhib-i arzuhâl Nevşehirli es-Seyyid Ömer Efendi b. es-Seyyid Ahmed nâm kimesne li-ebeveyn hâlî? oğlu olup işbu târihden on dört sene mukaddem fevt olan es-Seyyid İbrahim b. es-Seyyid el-Hâc İsmail’in verese-i münhasırası olan zevcesi Râbia Hatun bt. Mehmed ile sulbî kebîr oğulları es-Seyyid İsmail ve es-Seyyid Mehmed Reşid ve sulbiye kebîre kızı Şerîfe Fâtıma Hatun’dan ancak merkūm es-Seyyid Mehmed Reşid nâm kimesne hâzır olduğu hâlde meclis-i şer‘-i münîrde zikri âtî gedik âlât-ı lâzıme-i ma‘lûmesinin yedi yüz yirmi sehm i‘tibâriyle altmış sehmden vaz‘-ı yedi mütehakkık olan derûn-ı arzuhâlde mezkûrü’l-ism şîrugancı esnâfından Molla Ömer b. Yusuf nâm kimesne muvâcehesinde âlât-ı mezkûrenin ber-i‘tibâr-ı merkūm kırk bir sehm bir pul hisse-i şâyi‘asına kezâlik vaz‘-ı yedi mütehakkık olup bundan akdem verâseti zevcesi Şerîfe Fâtıma bt. Mehmed ile sulbiye kebîre kızı Şerîfe Âişe Hatunlara ve li-ebeveyn er karındaşı Hüseyin’e münhasıra olduğu hâlde fevt olan Teberdâr Zincirkıran demekle meşhûr Hasan Ağa b. Ahmed’in karındaşı oğlu ve dâmâdı ve veresesi mezbûrûn taraflarından husûs-ı âtîde tasdîka vekîlleri Teberdâr el-Hâc Osman Ağa hâzır olduğu hâlde mahrûse-i Galata’ya muzâfe kasaba-i Kasımpaşa’da Cumapazarı nâm mahalde vâki‘ başmuhâsebede mukayyed hufyeten yağhâne mu‘teber olunup bir bâb bezir ve şîruganhane derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme ile yağhâne-i mezkûre derûnunda sermâye tâ‘bir olunur yüz yirmi bin akçe kıymetli ma‘lûmü’l-keyl ve’l-vezn sisam ve keten tohumu ve revgan ve sâir eşyâ-i ma‘lûmenin yüz yirmi sehmi i‘tibâriyle altmış sehmi müteveffâ-i mezbûr es-Seyyid İbrahim’in ve yirmi iki buçuk sehmi mezbûrun li-ebeveyn er karındaşı müteveffâ es-Seyyid Molla Ali’nin ve otuz yedi buçuk sehmi âharın yedlerinde iştirâken ve şâyi‘an mülkleri iken mezbûr es-Seyyid Molla Ali bin iki yüz sekiz senesi Şevvâli’l-mükerremi selhinde işbu yedimde olan temessük mantûkunca gedik tâ‘bir olunan âlât-ı lâzıme-i ma‘lûme ile derûnunda sermâye tâ‘bir olunan hubûbât ve revgan ve eşyâ-i sâireden ber-i‘tibâr-ı merkūm mâlik olduğu yirmi iki buçuk sehm hisse-i şâyi‘ayı semen-i ma‘lûma bana bey‘ ve teslîm ben dahi iştirâ ve temellük ve tesellüm ve kabûl ve sene-i mezbûre Zilka‘desinin on beşinci günü ben tekrar mâlımdan bin guruş dahi ikrâr ve re’s-i mâl olarak işbu merkūm Molla Ömer’e teslîm ve fâide-i hâsılanın dört sehm i‘tibâriyle bir sehmi gedik mâliklerine ve bir sehmi sermâye mâliklerine verilip ve birer sehmi yağhâne-i mezkûre derûnunda olan merkūm Molla Ömer ile gāib ani’l-meclis [49b] elli dokuz bölük yoldaşlarından Süleyman Usta’nın i‘mâliye ücretimiz içün kendilere verilmek üzere akd-i şirket etmişken merkūm Molla Ömer ile müteveffâ-i mezbûr Teberdâr Hasan Ağa sağlığında benimle müteveffâ-i merkūm es-Seyyid İbrahim’in âlât ve sermâye-i mezkûrede olan cem‘an seksen iki buçuk sehm hisse-i şâyi‘amızı fuzûlî zabt ve vaz‘-ı yed edüp ve mezbûrân es-Seyyid İbrahim ve Teberdâr Hasan Ağa bundan akdemce fevt ve merkūm es-Seyyid İbrahim’in altmış sehm hisse-i şâyi‘ası veresesi mezbûrûna mevrûs olmağla ben âlât ve sermâye tâ‘bir olunan hubûbât ve revgan ve eşyâ-i sâire-i ma‘lûmeden olan yirmi iki buçuk hisse-i şâyi‘am ile mezbûr Molla Ömer’e medfû‘um olan meblağ-ı mezbûr bin guruşu ben bi’l-asâle ve mezbûr es-Seyyid İbrahim’in altmış sehminde olan hisse-i şâyi‘adan oğlu hâzır-ı mezbûr es-Seyyid Mehmed Râşid hisse-i irsiyye-i ma‘lûmesini bi’l-verâse taleb ederiz deyü da‘vâ ettiklerinde merkūm Molla Ömer cevâbında yağhâne-i mezkûre derûnunda gedik âlât-ı lâzımesinin yüz yirmi sehm i‘tibâriyle kırk bir sehm bir pul hissesi müteveffâ-i mezbûr es-Seyyid Molla Ali’nin ve kırk bir sehm bir yol hissesi karındaşı müteveffâ-i mezbûr es-Seyyid İbrahim’in yedlerinde mülkleri iken merkūm es-Seyyid Molla Ali hayâtında bin iki yüz sekiz senesi Zilka‘desinin on birinci günü mâlik olduğu kırk bir sehm bir pul hisse-i şâyi‘asını yedi yüz elli guruş semen-i makbûza Molla Salih Yazıcı b. el-Hâc Osman’a bâ-hüccet bey‘ ve temlîk ve teslîm ol dahi iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i de‘âvîden her biri âharın zimmetini kabûlü hâvî ibrâ ve iskāt eylediklerinden sonra mezbûr Molla Salih Yazıcı dahi iki yüz dokuz senesi Zilka‘desinin yirmi birinci günü sekiz yüz on sekiz guruş semen-i makbûza bana bâ-hüccet bey‘ ve temlîk ve teslîm ben dahi ba‘de’l-iştirâ ve’t-temellük ve’t-tesellüm mebî‘-i mezkûrun tağrîr ve gabnine müte‘allika âmme-i de‘âvîden her birimiz âharın zimmetini kabûlü hâvî ibrâ ve iskāt edüp ve müteveffâ-i merkūm es-Seyyid İbrahim dahi hayâtında mâlik olduğu kırk bir sehm bir pul hisse-i şâyi‘asını bin iki yüz dokuz senesi Muharreminin sekizinci günü yedi yüz altmış guruş semen-i makbûza müteveffâ-i merkūm Zincirkıran Hasan Ağa’ya bâ-hüccet bey‘ ve temlîk ve teslîm ol dahi ba‘de’l-iştirâ ve’t-temellük ve’t-tesellüm mebî‘-i mezkûrun tağrîr ve gabnine müte‘allika âmme-i de‘âvîden her birimiz âharın zimmetini kabûlü hâvî ibrâ ve iskāt eylediklerinden sonra mezbûr Hasan Ağa bundan akdemce fevt ve hisse-i mezbûresi veresesi merkūmûna mevrûs olup ve işbu müdde‘î-i merkūm es-Seyyid Ömer Efendi bin iki yüz yirmi üç senesi Cemâziyelevvelinin on yedinci günü Çarşamba günü arz odasında nezâret-i hazret-i Şeyhülislâmîde âsûde evkāf müfettişi el-Hâc Mehmed Sâdık Efendi hâzır olduğu hâlde İstanbul Kādısı esbak merhûm Mehmed Hidâyetullah Efendi huzûrunda yağhâne-i mezkûre gediğinde olan ber-i‘tibâr-ı merkūm seksen iki buçuk hisse-i şâyi‘ayı kendi nefsinden asâleten ve merkūm es-Seyyid İbrahim’in evlâd-ı sıgāra taraflarından vesâyeten benimle müteveffâ-i mezbûr Hasan Ağa’dan da‘vâ ve biz gedik-i mezkûrda olan ber-i‘tibâr-ı merkūm seksen iki buçuk hisse-i şâyi‘anın kırk bir sehm bir pul hisse-i şâyi‘asını mezbûr es-Seyyid Molla Ali hayâtında mukaddem târihiyle mezbûr Molla Salih Yazıcı’ya bâ-hüccet vech-i meşrûh üzere bey‘ ve temlîk ve teslîm ol dahi ba‘de’l-iştirâ ve’t-temellük ve’t-tesellüm bana bâ-hüccet bey‘ ve temlîk ve teslîm ve merkūm es-Seyyid Molla İbrahim dahi kırk bir sehm bir pul hisse-i şâyi‘asını müteveffâ-i merkūm Hasan Ağa’ya bâ-hüccet bey‘ ve temlîk ve teslîm eylediğini müdde‘î-i merkūm es-Seyyid Ömer Efendi muvâcehesinde şâhideyn-i mu‘âdileyn şehâdetleriyle ba‘de’l-isbât müdde‘î-i mezbûr es-Seyyid Ömer Efendi husûs-ı mezkûru dahi bi-tamâmihî tâyi‘an ve kat‘iyyen ikrâr u i‘tirâf etmekle mûcebince müdde‘î-i mezbûr es-Seyyid Ömer Efendi da‘vâ-yı mezkûresiyle benimle merkūm Hasan Ağa’dan her birimize bî-vech-i şer‘î mu‘ârazadan men‘ olunduktan sonra müdde‘î-i mezbûr es-Seyyid Ömer Efendi husûs-ı mezkûru iki yüz otuz altı senesi Zilhiccesinin on dokuzuncu günü Galata Kādısı fazîletlü Münib Efendizâde es-Seyyid Mehmed Sâdık Efendi huzûrunda benimle müteveffâ-i mezbûr Hasan Ağa’nın veresesinden da‘vâ biz dahi mazmûn-ı i‘lâm-ı mezkûru ber-nehc-i şer‘î isbât edüp tekrar mu‘ârazadan ba‘de’l-men‘ müdde‘î-i mezbûr es-Seyyid Ömer Efendi işbu sene-i mübâreke Saferinin on birinci günü kendiden asâleten ve müteveffâ-i mezbûr es-Seyyid İbrahim’in oğulları mezbûrân es-Seyyid Mehmed Reşid ve es-Seyyid İsmail taraflarından vekâleten iki yüz sekiz senesi Zilka‘desinde bi-tarîkı’l-mudârebe ben mâlımdan bin guruş ve müteveffâ-i merkūm es-Seyyid İbrahim dahi mâlından bin guruş ki cem‘an iki bin guruş bana vermişidin deyü inkârıma mukārin benden da‘vâ ve mürûr-ı zamân ile men‘ olunmuş idi deyü mazmûnları takrîrine mutâbık üç kıt‘a i‘lâm ve üç kıt‘a hüccet-i şer‘iyye ibrâzıyla eylediği defini ve mezâmin-i i‘lâm ve hücec-i şer‘iyyeyi müdde‘î-i mezbûr es-Seyyid Ömer Efendi ile merkūm es-Seyyid Mehmed Reşid’den her biri ikrâr u i‘tirâf etmeleriyle mûcebince müdde‘î-i mezbûr es-Seyyid Ömer Efendi ile hâzır-ı mezbûr es-Seyyid Mehmed Reşid’den her biri da‘vâ-yı mezkûreleriyle mezbûr Molla Ömer ile müteveffâ-i merkūm Hasan Ağa’nın veresesi mezbûrûna bî-vech-i şer‘î tekrar mu‘ârazadan men‘ olundukları İstanbul Mahkemesi’nden huzûr [-ı âlîlerine i‘lâm olundu.] Fî 4 C sene 1237