İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 352 Hüküm no: 333 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayazzâde Seyyid Ahmed Ağa’nın malik olduğu oda gediğini Acı Markar v. Delot’a sattığı Oda gediği mübâya‘asıdır Ma‘rûz[-ı dâ‘î-i devlet-i aliyyeleridir ki] Şam-ı şerîf tüccârından Ayazzâde es-Seyyid Ahmed Ağa b. Mehmed Şâkir nâm kimesne meclis-i şer‘-i münîrde İstanbul’da Nuruosmaniye Câmi‘-i şerîfi kurbünde vâki‘ Yağcı Hanı odabaşısı Acı Markar v. Delot nâm zimmî muvâcehesinde mahmiye-i mezbûrede zikr olunan Nuruosmaniye Câmi‘-i şerîfi kurbünde kâin defterdâr-ı esbak merhûm Abdüsselam Efendi Vakfı müsakkafâtından yağcı gılâfı demekle ma‘rûf ma‘lûmü’l-hudûd bir bâb kârgîr hanın tabaka-i ulyâsında Sofcular Hanı cânibinde vâki‘ köşeye muttasıl kadîmi şehriye altı guruş kirâlı bir bâb oda derûnunda mevcûde gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca yedinde emvâlim olan âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin iki bin guruş semen-i makbûza mesfûr Acı Markar zimmîye bey‘ ve temlîk ve teslîm eylediğimde ol dahi yedimden iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibara-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ ba‘d zikr olunan oda gediği tâ‘bir olunur âlât-ı lâzıme-i ma‘lûme mersûm Acı Markar zimmînin mâl-ı müşterâsı ve hakk-ı sırfı olup benim kat‘â alâka ve medhalim kalmamışdır deyü ba‘de’l-ikrâr ve’t-tasdîk zikr olunan oda gediğinin kayd-ı evveli bâyi‘-i mezbûr Ayazzâde es-Seyyid Ahmed Ağa üzerinden ref‘ ve terkīn ve atîk sûreti kaleminde battâlda hıfz olunup müşteri-i mesfûr Acı Markar ismine kayd ile yedine sûret i‘tâsı bâbında istid‘â-yı inâyet eyledikleri İstanbul Mahkemesi’nden huzûr-ı âlîlerine i‘lâm olundu. Fî 10 L sene 1237