İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 459 Hüküm no: 445 Orijinal metin no: [92b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Salih Nazif Efendi’nin, Sarraf Avanes v. İstefan’a olan borcunu ödemesi gerektiği Def‘u’d-def‘ini isbât edemeyip 13.427 guruş hüküm Ma‘rûz[-ı dâ‘î-i devlet-i aliyyeleridir ki] Sâhib-i arzuhâl Sarraf Avanes v. İstefan nâm zimmî şerîki olup bundan akdem hâlik olan Kirkor zimmînin babası ve hasran vârisi Haçok v. Sahak nâm zimmî hâzır olduğu hâlde Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde derûn-ı arzuhâlde zikr olunduğu üzere Öziçe Kalesi binâ emini Süleyman Ağa’nın mukaddemâ Âsitâne-i aliyyede umûrunu rü’yet eden derûn-ı arzuhâlde ismi mezkûr es-Seyyid Hâfız Salih Nazif Efendi b. Osman muvâcehesinde mezbûr es-Seyyid Hâfız Salih Nazif Efendi mukaddemâ merkūm Süleyman Ağa’nın umûrunu rü’yet eder iken mâlımdan ikrâz ve teslîm ol dahi iktirâz ve kabz ve bana ale’l-hesâb edâ ve teslîm eylediği mebâliğin hesâbını sahîhan rü’yet eylediğimizde merkūm es-Seyyid Hâfız Salih Nazif Efendi zimmetinde gayr-ez makbûz cihet-i merkūmeden bâkī on üç bin dört yüz yetmiş yedi guruş alacak hakkım zuhûr edüp meblağ-ı merkūm zimmetinde sahîhan bana deyni olduğunu ikrâr ve bin iki yüz otuz altı senesi Zilka‘deti’ş-şerîfesi gurresi târihiyle müverrah bir kıt‘a tahvîl dahi i‘tâ edüp ba‘dehû sene-i mezbûre Zilhicceti’ş-şerîfesi’nin on dokuzuncu günü târihiyle müverrah diğer bir kıt‘a tahvîl mantûkunca yine mâlımdan merkūma iki bin yedi yüz guruş dahi ikrâz ve teslîm ol dahi iktirâz ve kabz edüp ol vechile merkūm es-Seyyid Hâfız Salih Nazif Efendi zimmetinde cem‘an on altı bin yüz yetmiş yedi guruş müstakillen alacak hakkım olup şerîkim hâlik-i mesfûrun alâkası olmamağla meblağ-ı mecmû‘-i mezkûru taleb ederim deyü hâzır-ı mesfûr Haçok zimmînin tasdîkiyle ba‘de’d-da‘vâ ve’l-istintak merkūm es-Seyyid Hâfız Salih Nazif Efendi cevâbında müdde‘î-i mesfûrun da‘vâ-yı mezkûresini tamamen ikrâr lâkin meblağ-ı mecmû‘-ı mezkûrun iki bin yedi yüz elli guruşunu zevcem Emine Hanım’ın âhara kasr-ı yed eylediği sehm hissesi mu‘accelesinden kabz ve deyn-i mezkûruma mahsûben müdde‘î-i mesfûra teslîm etmemle ol mikdârını dahi kabz ve istîfâ etmekle meblağ-ı mecmû‘-ı mezkûrun ol mikdârından zimmetim berîe olup bâkī on üç bin dört yüz yirmi yedi guruş hâlâ deynimdir deyü eylediği def‘inde müdde‘î-i mesfûr meblağ-ı merkūm iki bin yedi yüz elli guruşu kabzını tamamen ikrâr lâkin târih-i merkūmda mezbûr ile hesâb rü’yet eylediğimizde meblağ-ı mezbûru kable’l-kabz makbûzâtla idhâl edüp ol vechile ba‘de’l-muhâsebe kabz eyledim deyü hesâb-ı mezkûrda dâhil olduğu da‘vâsıyla merkūm es-Seyyid Hâfız Salih Nazif Efendi’nin inkârına mukārin [93a] eylediği def‘u’d-def‘ini isbâtdan ızhâr-ı acz edüp talebiyle muvâcehesinde mezbûr es-Seyyid Hâfız Salih Nazif Efendi ber-nehc-i şer‘î ba‘de’t-tahlîf ikrârı mûcebince meblağ-ı mecmû‘-ı mezkûrdan bâkī on üç bin dört yüz yirmi yedi guruşun bi’t-taleb müdde‘î-i mesfûr Sarraf Avanes zimmîye edâsıyla mezbûr es-Seyyid Hâfız Salih Nazif Efendi ilzâm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 12 Za sene [1]237