İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 101 Hüküm no: 58 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Hacı Mustafa’nın manav dükkânını Seyyid İbrahim b. Mehmed’e sattığı Manav Mahmiye-i İstanbul hısnı ebvâbından Topkapı dâhilinde Bâyezid Ağa mahallesinde sâkine olup zâtı Bâb-ı âlî tulumbacılarından el-Hâc Mustafa Ağa b. el-Hâc Mustafa ve mahalle-i mezbûre sâkinlerinden Hancı Hasan Ağa b. Hüseyin nâm kimesneler ta‘rîfleriyle mu‘arrefe olan Zeliha Hatun bt. Ali meclis-i şer‘-i şerîf-i enverde manav tâifesinden işbu bâ‘isü’l-kitâb es-Seyyid İbrahim b. Mehmed nâm [kimesne] mahzarında ikrâr-ı tam ve takrîr-i kelâm edip mahmiye-i mahkiyede Kapan-ı dakīk kapısı hâricinde ma‘lûmü’l-hudûd bir bâb manav dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz altmış sehm i‘tibâriyle yirmi bir sehmi Saide Hanım’ın ve on yedi sehmi Mehmed Tâhir nâm sagīrin ve mâ‘adâ yüz yirmi iki sehmi benim bâ-hüccet-i şer‘iye yedimizde iştirâken mâlımız ve mülkümüz olmağla ben âlât-ı lâzıme-i merkūmeden ber-i‘tibâr-ı mezkûr akd-i âti’z-zikrin sudûruna değin ber-vech-i muharrer mâlike olduğum yüz yirmi iki sehm hisse-i şâyi‘a-i mezkûremi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîklerim izin ve icâzetleriyle bin beş yüz guruşa es-Seyyid İbrahim’e bey‘ ve temlik ve vech-i lâyıkı üzere teslîm eylediğimde ol dahi yedimden ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm bin beş yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d sâlifü’l-beyân yüz yirmi iki sehm hisse-i şâyi‘ada benim kat‘a alâka ve medhalim kalmayup merkūm es-Seyyid İbrahim’in mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 11 M sene [1]238. Şühûdü’l-hâl: Pazarbaşı es-Seyyid İbrahim [b.] Sârım Bey, Musa Yazıcı, Bâb-ı âlî tulumbacıları reisi Abdullah b. İshak, Manav Mehmed b. Mehmed.