İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 117 Hüküm no: 77 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Yuvan v. İstefan’ın mâlik olduğu bakkal mahzenini Aslan v. Abraham’a sattığı Bakkāl mahzeni Kaydı ihrâc şüd. Fî 10 Safer sene 1315. Mukayyid-i mahkeme es-Seyyid Resûl Hilmi Mahmiye-i İstanbul’da kâin bakkāl esnâfından Yuvan v. İstefan nâm zimmî tarafından husûs-ı âti’l-beyânı ikrâr ve i‘tâ-i hüccete vekîl olduğu Simyon v. Todori ve diğer Yuvan v. İstirati nâm zimmîler şehâdetleriyle ber-nehc-i şer‘î sâbit olan Todori v. Nikola nâm zimmî meclis-i şer‘-i hatîr-i lâzımü’t-tevkīrde esnâf-ı mezkûreden bâ‘isü’s-sifr Aslan v. Abraham nâm zimmî muvâcehesinde bi’l-vekâle ikrâr-ı tam ve takrîr-i kelâm edip müvekkil-i mesfûr Yuvan zimmî mahmiye-i mahkiye hısnı ebvâbından Balık Pazarı Kapısı hâricinde Karaköy iskelesi sokağının sol tarafında vâki‘ ikinci bir bâb bakkāl mahzeni derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle seksen sehm âharların ve mâ‘adâ kırk sehm hisse-i şâyi‘ası akd-i âti’z-zikrin sudûruna değin benim yedimizde bâ-hüccet-i şer‘iye iştirâken mâlımız ve mülkümüz olmağla ben âlât-ı lâzıme-i mezbûreden i‘tibâr-ı mezkûr üzere mâlik olduğum kırk sehm hisse-i şâyi‘amın yirmi sehmini işbu târih-i kitâb günü diğer bir kıt‘a hüccet-i şer‘iye ile âhara bey‘ etmemle mâ‘adâsı olan yirmi sehm hisse-i şâyi‘amı dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîklerim izinleri ve pazarbaşısı ve bölükbaşı ve bi’l-cümle nizâm ustaları ma‘rifetleriyle bin iki yüz elli guruşa mersûm Aslan zimmîye bey‘ ve temlik ve vech-i lâyıkı üzere teslîm eylediğimde ol dahi yedimden ber-vech-i mübeyyen iştirâ ve temellük ve tesellüm ve kabz ü kabûl ve semeni olan meblağ-ı merkūm bin iki yüz elli guruşu [17a] bana def‘ ü teslîm ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan yirmi sehm hisse-i şâyi‘ada benim kat‘a alâka ve medhalim kalmayup mersûm Aslan zimmînin mâl-ı müşterâsı ve hakk-ı sırfı olmuşdur dedi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 28 M sene [1]238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi, Yazıcı Eftat, Çakıroğlu Yorgi, Düğenci Lefter, Lazari.