İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 129 Hüküm no: 91 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Halil’in mâlik olduğu manav dükkânını Seyyid Osman Beşe b. İbrahim ve Seyyid Süleyman Beşe b. İsmail’e sattığı Manav Mahmiye-i İstanbul’da Cebb-i Ali kapısı dâhilinde Küçük Mustafa Paşa kurbünde Molla Hüsrev Mahallesi sâkinelerinden olup zâtı ta‘rîf-i şer‘î ile mu‘arrefe olan Âişe nâm-ı diğer Emine Hatun bt. Halil meclis-i şer‘-i hatîr-i lâzımü’t-tevkīrde mahmiye-i mezbûrede kâin manav tâifesinden işbu bâ‘isü’l-kitâb es-Seyyid Osman Beşe b. İbrahim ve es-Seyyid Süleyman Beşe b. İsmail nâm kimesneler mahzarlarında ikrâr-ı tam ve takrîr-i kelâm edip mahmiye-i mezbûrede Irgad Pazarı nâm mahâlde kâin tarafeyni yemenici ve yazıcı dükkânları ve bir tarafı Tevekkül Hanı ve bir tarafı tarîk-i âm ile mahdûd bir bâb manav dükkânı derûnunda mevcûde şurût-ı nizâmda dâhil beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehm-i şâyi‘ı dükkân-ı mezkûrun bi’l-icâreteyn islâsen mutasarrıfları olan Mustafa Ağa ve Âişe Hatun ve karındaşları sagīr Mehmed Kâmil ile vâlideleri Habibe Hatun’un mülk-i mevrûsları ve mâ‘adâ altmış sehm-i şâyi‘ı akd-i âti’z-zikrin sudûruna değin bâ-hüccet-i şer‘iye ve bâ-i‘lâm mülk-i müşterâm olmağın ben âlât-ı lâzıme-i mezkûreden ber-minvâl-i muharrer yedimde mâlım ve mülküm olan altmış sehm hisse-i şâyi‘a-i mezkûremi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şürekâ-i mezbûrûn izin ve icâzetleriyle ba‘de’l-müzâyede ve inkıtâ‘ü’r-rağbe semen-i misli idüğü zâhir ve mütehakkık olan iki bin iki yüz guruşa mezbûrân es-Seyyid Osman Beşe ve es-Seyyid Süleyman Beşe’ye ale’l-iştirâki’s-seviyy bey‘ ve temlik ve vech-i lâyıkı üzere teslîm eylediğimde onlar dahi yedimden iştirâken [iştirâ] ve temellük ve tesellüm ve kabz ü kabûl ve semeni olan meblağ-ı merkūm iki bin iki yüz guruşu bana def‘ ü teslîm ben dahi yedlerinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan manav dükkânı derûnunda mevcûde gedik ta‘bîr olunur âlât-ı lâzıme-i merkūmenin i‘tibâr-ı mezkûr üzere altmış sehm-i şâyi‘ı mezbûrân es-Seyyid Osman Beşe ve es-Seyyid Süleyman Beşe’nin iştirâk-i seviyy üzere mâl-ı müşterâları ve hakk-ı sırfları olup benim kat‘a alâka ve medhalim kalmamışdır dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 6 S sene [1]238. Şühûdü’l-hâl: Başyemiş Pazarbaşısı es-Seyyid İbrahim Sârım Bey b. Ahmed Bey, Bölükbaşı Musa Yazıcı, Muhzır Molla Hüseyin, Muhzır Molla Halil, Muhzır Molla Mahmud.