İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 135 Hüküm no: 99 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Aci Yorgi v. Zakar’ın bakkal dükkânını İsak v. Ananya’ya sattığı Topkapı dâhilinde bakkāl Mahmiye-i İstanbul’da kâin bakkāl esnâfından Aci Yorgi v. Zakar nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden hâmilü’r-rakīm İsak v. Ananya nâm zimmî tarafından husûs-ı âti’l-beyânı tasdîka vekîl-i şer‘îsi Avakim v. Mihal nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Topkapı dâhilinde çeşme karşısında vâki‘ Ali Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle otuz üç buçuk sehmi âharın ve mâ‘adâ seksen altı buçuk sehmi iki kıt‘a hüccet-i şer‘iye mantûklarınca benim yedimde mâlım ve mülküm olmağla ben âlât-ı lâzıme-i mezkûreden ber-i‘tibâr-ı merkūm akd-i âti’z-zikrin sudûruna değin yedimde mâlım olan seksen altı buçuk sehm hisse-i mezkûremin yirmi altı buçuk sehmini yedimde ibkā edip mâ‘adâsı olan altmış sehmin otuz sehmini müvekkil-i mesfûrun karındaşı Yuvan nâm zimmîye diğer bir kıt‘a hüccet mantûkunca semen-i ma‘lûm ve makbûza bâtten ve sahîhan bey‘ ve temlik etmemle bâkī otuz sehmini dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîk-i âharım izin ve icâzeti ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle bin yüz yirmi beş guruşa müvekkil-i mersûm İsak zimmîye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm bin yüz yirmi beş guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrenin i‘tibâr-ı merkūm üzere sâlifü’l-beyân otuz sehmi müvekkil-i mersûm İsak zimmînin mâl-ı müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 23 S sene [1]238. Şühûdü’l-hâl: Eş-şâhidûne’s-sâbıkūn.