Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 49 Hüküm no: 32 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pendik’te görev yapan yeniçeri yasakçısının azledilip yerine yenisinin tayin edildiği Hâlâ Pendik kādısı izzetlü fazîletlü efendi hazretlerinin nâdîne-i izzet-mevfûrlarına dürer-i de‘avât-ı sâfiyât-ı muhabbet-füzûn ve gurer-i teslîmât-ı vâfiyât-ı meveddet-nümûn ithâfından sonra inhâ-i muhibbânemiz budur ki Kadîmü’l-eyyâmdan bâ-hatt-ı hümâyûn-ı şevket-makrûn Dergâh-ı âlî yeniçerilerine postal-baha ta‘yîn ve ihsân buyrulan kolluklardan hâlâ taht-ı hükûmetinizde vâki‘ yasakçı olan yoldaş ref‘ olunup yerine üslûb-ı sâbık üzere Dergâh-ı âlî yeniçerilerinden ( ) nâm yoldaş işbu bin yüz yetmiş sekiz senesi mâh-ı Zilka‘de gurresinden sene-i kâmilesi on iki ay tamâmına değin yalnız bir değnek verilüp yasakçı nasb ü ta‘yîn olunmağla işbu mektûb tahrîr ve irsâl-i huzûrları kılındı vusûlünde gerekdir ki merkūmu yasakçılık umûrunda kıyâm ve istihdâm eyleyüp âharı müdâhale etdirmeyüp tarafınıza mürâca‘at eylediği umûr ve husûslarında bi-hasebi’ş-şer‘ ve’l-kānûn imdâd ve i‘ânet eyleyüp hilâf-ı şer‘-i şerîf ve mugāyir-i kānûn-ı münîf bir kimesneye rencîde etdirmeyesiz. Tahrîren fi’t-târîhi’l-mezbûr